Jowai, Naitung 02:
Ka Ummulong Presbyterian College kaba dei ka kolej kaba nyngkong eh hapoh Nartiang konstitwensi bad kaba hap hapoh ka Thadlaskeiñ C&RD Block, West Jaiñtia Hills District ka la rakhe ïa ka lyngkhuh dap 10 snem ka jingïaid lynti jong ka ban kyntiew ïa ka pule-puthi naduh ba la seng ha u snem 2013.
Ïa kane ka jinglehkmen la wan ban plie ïa ka da u Chief Executive Member (CEM) ka JHADC, u Bah Thombor Shiwat ha ka jingdonlang u MDC ka Ummulong-Moodymmai, u Bah Jesse Suïam ha ka jingïalang kaba la pynïaid da u Tbn P. Shilla ha Youth Centre ka Balang Ummulong, Presbyterian ha ka Sngi Saitjaiñ.
U Bah Shiwat ha ka jingkren kum u kongsan u la pynbna ba ka JHADC kan synñiang T.5 lak sha ka Ummulong Presbyterian College.
U CEM haba kren shuh shuh, u la ong, “Phi lah ban phylla nangno ïoh pisa ka JHADC haba tang ka tulop kam ïoh ban siew ïa ki nongtrei, hynrei kane ka pisa ka dei kaba wan na ka Sorkar Pdeng na ka ’15th Finance Commission’.”
Ha kane ka sngi la ïadonlang ruh u Waheh Shnong, Ummulong u Bah Leo Laloo, u dkhot ka ‘Sponsoring Body’, u Bah Briwon Pohshna nalor kiwei-kiwei.
Kham ha shuwa la ïoh ka jingkren na u Principal ka kolej, u Dr A.J. Lymba bad ïa ka khana jong ka kolej ba la ïathuh da ka Vice Principal, Kong Idahunshisha Shullai.
Khyndiat shaphang ka Ummulong Presbyterian College, ka jngai 15 km na nongbah Jowai. Ka Ummulong Presbyterian College ka la dep ban pynrung kyrteng ïalade hapoh ka Meghalaya Society Registration Act 1983 bad ka pynïasoh bad ka Thomas Jones Synod College, Jowai.
Ka rukom pynlong klas ka long ha ki 2 bynta – ‘Day Shift’ bad ‘Evening Shift’, hynrei ïa ka ‘Evening Shift’ la sangeh noh ha u snem 2018.
Ïa mynta kane ka kolej ka dang don tang ïa ka tnad pule ‘Arts’ bad ki samla pule ki don 265 ngut.
Ha u Ïaïong 2021, ka NEHU hapoh ka jingïalam u Dr. D.R.L. Nonglait ka la pynlong ka jingjurip ïa ka kolej bad mynta ka kolej ka dang ap ïa ka ‘Professional Affiliation’ na ka NEHU.
