Shillong, Naitung 03:
Namar ka jingkynrei eh jong u drok hapoh South West Khasi Hills District khamtam eh hapoh ka thaiñ Mawkyrwat baroh kawei, ka Khasi Students’ Union (KSU) South West Khasi Hills District lem bad ki nongïalam na phra tylli ki shnong bad ki seng samla shnong ka thaiñ Mawkyrwat ki la leit ban ïakynduh bad aiti ïa ki san tylli ki jingai jingmut ha u Myntri ba dei khmih ïa ka tnat Social Welfare, Bah Paul Lyngdoh halor kane ka bynta.
Haba kren sha ki lad pathai khubor, u President ka KSU SWKHD, u Bah Forwardman Nongrem u la ong ba ha katei ka jingleit ïakynduh ïa utei u Myntri, ka seng ka la rah kumba san tylli ki mat kiba kynthup ïa ka jingdonkam ban buh noh ïa ka ‘Rehabilitation Centre’ hapoh Mawkyrwat na ka daw ka jingjyllei jong ki samla kiba la kyrni ha u drok bad kiba bun na kiba ngop ha u drok ha katei ka thaiñ ki dei kiba wan na ki longïing longsem kiba duk bad kumta ka jingbuh ïa katei ka jaka ai jingsumar kan pyllait ïa ki na kane ka jingkyrni bad kin ïoh biang ïa ka jingim kaba thymmai, ka jingbym don ka jingbuddien ïa ki nongkhaïi drok kaba la pynlong ïa ki ba kin leh ïa kajuh shi kajuh ka kam wat hadien ka jingshah kem ka jong ki, ban thaw ïa ka District Level bad ka Block Level Committee bad ban kynthup lang ruh ïa ki samla ka shnong hapoh katei ka Committee, ban aibor ïa ki shnong ban ïakhun pyrshah ïa kane ka jingkynrei jong u drok bad ka seng ka la pynsngew ruh ha utei u Myntri halor ka jingbymler kam jong ka Anti Narcotic Task Force (ANTF) kaba don hapoh South West Khasi Hills District ban khanglad ïa u drok hapoh katei ka thaiñ.
Shuh shuh u Bah Forwardman u la ong ba ym pat ju ïohi ba ka tnat pulit kan kem wat ïa uwei ruh u nongkhaïi drok lane ïa u nongdih drok hapoh ka thaiñ Mawkyrwat. Hynrei ha kiba bun ki khep la kem hi da ki nongkitkam ka shnong bad ki sengbhalang. Kumta ka seng ka la kyrpad ïa utei u Myntri ba u dei ban pyntikna ba ka ANTF kam dei ban don tang ka kyrteng, hynrei ka dei ban pyndep ruh ïa ka kam jong ka khnang ban lah tehlakam ïa u drok hapoh ka thaiñ Mawkyrwat baroh kawei.
“Ngim pat ju ïohi ba ka tnad pulit lane ki pulit kin kem wat ïa uwei ruh u nongkhaïi drok ne ïa u nongdih drok hapoh ka thaiñ Mawkyrwat, hynrei kiba bun hi kiba jia kum kita la kem da ki nongïalam ka shnong, ki seng samla shnong, ki seng longkmie shnong bad ki sengbhalang bapher bapher bad kane ka pyni ïa ka jingdkoh treikam jong ka tnat pulit ban tehlakam ïa u drok”, la ong u Bah Nongrem.
U Bah Nongrem u la ong ba kane ka jingkheiñ sting jong ka tnat pulit ban tehlakam ïa u drok hapoh katei ka thaiñ ka la pynsuba sniew ïa u babun balang ba lehse ka tnad pulit ka don bynta bad ki nongkhaïi drok.
“Ha kaba ïadei bad ka jingsuba bad ka jingïakren ha lynti ha syngkien, kiba bun balang ki kynnoh ba lada dei ba ka tnat pulit kam ïa don bynta bad kine, ka la dei ban pyndep ïa ka bynta, hynrei kaei kaba ïakren da kiba bun balang ka pyni ba na ka liang ka tnad pulit ka shim sting bad haba ka shim sting hi, ki mih kiba kum kita ki jingkynnoh”, la ong u Bah Nongrem
U Bah Nongrem u la ïathuh ba na ka liang jong utei u Myntri u la kular ba un sa ïakren bad ki bor synshar jong ka SWKHD ba kan pynurlong ïa ka jingdawa jong ka seng. Lada kine ki jingdawa kim urlong, na ka liang ka seng bad ki nongïalam shnong kim banse ban hap pyrkhat da kawei ka sienjam kaba ki hap ban shim ban pynkyndit bynriew ïa ka tnat pulit lane ïa ki bor sorkar ban shimkhia halor kane ka mat.
Na ka liang u President ka Seng Samla Shnong Mawten, Bah C.A Lyngdoh, u la ong ba na ka liang ki seng samla shnong bapher bapher kiba don hapoh ka SWKHD ki la ai ka jingkyrshan kaba pura ïa ka seng KSU SWKHD halor ka jingïohi jong ka ban tehlakam ïa ka thma kaba jar jar kata ïa ka jingjyllei jong u drok.
“Ka dei ka por kaba biang eh ba ngi ïoh ban ïakhun bad ïaleh pyrshah bad u drok khnang ba ka lawei jong ki khun samla kan nym don kaei kaei ka jingjia kaba kham sniew ïa ki hynrei ba kin dang lah ban bteng ïa ki jingpule bad ban im ha ka bha ka miat na ka bynta ka distrik bad na ka bynta ka jylla hi baroh kawei”, la ong u Bah Lyngdoh.
