Jowai, Naitung 03:
Ka lehniam Behdienkhlam ba saw sngi lynter ba shait pynlong shisien shisnem da ki jaitbynriew Pnar ba dang bat ïa ka niam tynrai (Niamtre) kan sdang ha ka 6 tarik haduh 9 tarik Naitung.
Ïa kane la pynbna da u President ka Seiñraij Jowai u Bah OR Shallam bad u Dolloi ka Elaka Jowai u Bah Puramon Kynjing haba ïakren bad ki lad pathai khubor ha shlem treikam ka Seiñraij Jowai ha ka Lah Sngi U Blei.
U Bah OR Shallam u la khot sngewbha ïa baroh ki paidbah sha ka jinglehkmen Shad Behdienkhlam na bynta ban ïoh ka jingkyrkhu, ka jingkoit jingkhiah, ka roi ka par, ka jingdap jingbiang, ka jingkiew ha ka kamai kajih, ka pule puthi bad ki jingkyrkhu ha baroh ki liang.
U la ïathuh ruh ba ka Behdienkhlam ka la ïadon bynta lang bad ka tnat Arts & Culture, Tourism, NEC, ha kaba ka G-20 ruh kan kynthup lang.
U la pyntip ba ki kynrem ki lyndan ki ban wan sakhi ïa ka Behdienkhlam ki kynthup ïa u Lat ka jylla, ki Myntri sorkar, ki MLA ka rilum Jaiñtia, ki MDC nalor kiwei.
Nalor kata, u la khot sngewbha ruh ïa baroh ki paidbah sha kane jinglehniam na bynta ban ïoh ka jingkyrkhu, ka jingkoit jingkhiah, ka roi ka par, ka jingdap jingbiang, ka jingkiew ha ka kamai kajih, ka pule puthi bad ki jingkyrkhu ha baroh ki liang.
U Dolloi Bah Puramon Kynjing u la ong ïa ka Behdienkhlam la pyndep ïa ka halor ka nongrim ban lehkhmen bad ïashad sngewbha bad katkum ki hukum jong u Trekirot ka long ban burom ïa ka jingkyrkhu kiba la ïoh na ka mariang, ki ma ki woh, ki nongseng nongdang ïa ki shnong ki thaw, ban burom ïa ki blei shnong blei thaw kiba sumar sukher ïa ki nongshong shnong.
