Shillong, Naitung 03:
Ka flagship prokram ba la pyllait paidbah da ka Sorkar Jylla ha u Naitung 2022 ka Youth Engagement Through Empowered Youth Organisations (YESS) ka la dap shisnem bad ha kine ki shi snem ka sorkar ka la pyllait haduh T.4.5 klur sha kumba 1300 ngut ki samla.
Ha ka Sngi Nyngkong la pynlong ïa ka jingïalang ban rakhe ïa ka jingdap shisnem jong ka YESS Meghalaya ha Pinewood Hotel. Ha kane ka sngi la don lang u Myntri Rangbah ka Jylla, u Conrad K Sangma lem bad u Myntri ka tnat Ïalehkai, Bah Shakliar Warjri nalor kiwei pat.
U Myntri Rangbah ka Jylla, Conrad K Sangma ha kane ka sngi u la pynbna ruh ba ka Sorkar Jylla kan aiti noh sha ka tnat Sports & Youth Affairs ba kan pyntreikam ïa ka YESS Meghalaya, kaba ju pyntreikam da ka Chief Minister Secretariat.
Haba kren ha ka jingïalang, u Myntri Rangbah u la ong ba ka don ka jingbym biang kaba bun bha haba phai sha ki kam ba ki samla ki kwah ban leh bad ka jingkyrshan ba ki ïoh ban pyntreikam ïa kine ki kam ba ki thmu ban leh.
“Namarkata, kila don bun ki seng ki samla bad ki kynhun kiba leh ïa shibun ki kam dalade khlem ka jingkyrshan nangno nangno ruh hynrei kila leh ïa kine ki kam namar ka jingieid ïa ki,” u la ong haba bynrap “Kam don satia ka rukom pynbeit ba ryntih halor ka jingai jingïarap song pisa sha ki da ka Sorkar lane da ki tnat sorkar”.
U Conrad u la ong ba ka Sorkar Jylla ka dang pynkhreh ïa ki saiñdur ba janai khnang ban lah ai ïa ki song jingïarap pisa sha ki seng ki samla ba kin trei ïa ki kam ba ki kwah.
U la pyntip ruh ba kin sa don kiwei ki prokram na ka bynta ki nongseng kam, ki nongput nongtem, ki nongïalehkai bad ki nongshna phlim ba kin pyni pyrthei ïa ki kam jong ki bad ki jingjop ba ki ïoh khnang ba kiwei ki samla kin ïoh mynsiem lang.
“Ka long kaba kongsan ban ai mynsiem bad kyntu ïa ki samla bad ban pyni pyrthei ïa ka sap, kumta ki prokram kiban sa pyllait ha kine ki khyndiat sngi ban wan, kin ai ka rynsan ïa ki ban sei la ka sap,” ong u Myntri Rangbah.
“Ka YESS Meghalaya ka dei kawei na ki prokram kaba la treikam bha bad ngi ïohi ki samla ruh ki la wan shakhmat bha ban shim ïa ka prokram. Nga kyrpad ïa ki samla ba kin wan shakhmat bad register ïalade khnang ba ka Sorkar kan lah ban ai jingkyrshan ïa ki,” u la ong.
U Myntri Rangbah u la pyllait paidbah ruh ïa ki kyndon ba thymmai jong ka YESS Meghalaya bad u la sam ruh ïa ki cheque sha ki nongïoh myntoi na ka YESS Meghalaya.
