Shillong, Naitung 03:
Ki Executive Member (EM) ka Khasi Hills Autonomous District Council (KHADC) hapoh ka jingïalam u Chief Executive Member, u Bah Pynïaid Sing Syiem, ha ka Lah Sngi U Blei, ki la leit jngoh ïa ki jaka khappud ha ka thaiñ Block-2 kiba hap ha Raid Nongtung bad ki la ïakynduh ruh ïa ki nongïalam shnong ha ka jingïalang kaba la long ha Mawlasnai halor ki mat kiba ka KHADC kan pynsngew sha ka Regional Committee na ka bynta ka jingpynbeit pud.
Ynda la poi ha ki jaka khappud, u CEM bad ka kynhun ki EM ka la leit beit-beit sha ka shnong Ummat kaba hap hapoh ka Raid Nongtung ha kaba ki la leit jngoh ïa ka jaka kyntang kaba ju buh shyieng ïa ki longshwa manshwa kiba dei na ki 12 kur. Ïa kane ka jaka la tip kum ka Mawbah ki Khatar Kur kaba don ha Ummat.
Ki rangbah kur bad ki nongshong shnong, nalor ka Synjuk ki Rangbah Shnong ka Raid Nongtung, ki la donlang ha kane ka jingleit jngoh na ka bynta ban thaw lad ban pynneh pynsah bad pynbha ïa kane ka jaka buh shyieng jong ki longshwa manshwa kiba dei jong ki 12 kur, kum ka kur Shadap, Makdoh, Sten, Masharing, Saring, bad kiwei kiwei ki kur.
U Member of Autonomous Council (MAC) ka Karbi Anglong Autonomous Council (KAAC), u Abhijit Kro, uba mihkhmat ïa ka Chinthong konstitwensi ruh u la don ryngkat lang ha ka jingsynran lang ki ophisar na ka tnat khlaw jong ka KAAC.
La pynlong ïa jingïalang kaba lyngkot ha Mawbah ki Khatar Kur ba la pynïaid da u MLA bad MDC ka Mawhati konstitwensi, u Bah Charles Marngar. La ïoh ïa ka jingkren lyngkot na u CEM ka KHADC u Bah Pynïaid Sing Syiem, u MAC ka Chinthong konstitwensi u Abhijit Kro, bad u Bah Charles Marngar.
Na ka liang u Abhijit Kro, u la tyrwa ban ïarap pynbha ïa kane ka jaka kum ka lynti ban poi sha kane ka jaka buh shyieng ki 12 kur, ka jingker, bad na ka liang u CEM ka KHADC ruh u la ong ba ka KHADC kan sa mang pisa ban pynneh pynsah ïa kane ka jaka kaba kyrpang kaba dei ka riti ka dustur jong ki kur bad jaitbynriew Khasi kaba la don ha Ummat. U Bah Pynïaid u la banjur ban don ka jingïatreilang bad ban don ka shong suk shong shngaiñ ha kane ka thaiñ kaba ki Khasi ki shong ki sah.
U Bah Charles Marngar u la ong ba ka soskular hapdeng ka Assam bad Meghalaya ka la don lypa ban nym pynthut ïa ki kam pynroi lada ka wan na Assam ne Meghalaya, bad u kyrmen ba lyngba ka jingïatreilang na baroh arliang.
Ynda la ïapra na Ummat, ki EM ka KHADC ki la wan sha Mawlasnai bad pynlong ka jingïakynduh bad ki nongïalam shnong ha kaba ki la ïakren ïa ka mat kaba ïadei bad ka jingpynbeit pud.
Haba kren sha ki lad pathai khubor hadien ka jingïakynduh bad ki nongïalam shnong, na ka Liang u CEM, u Bah Pynïaid Sing Syiem u la ong ba ka jingleit sha khappud ka long kum ka jingpynshngaiñ ïa ki paradoh para snam kiba shong ha kito ki jaka bad kim dei ban shah pynthut kumba ka jia na ka por sha ka por, hynrei ka dei ban don ka jingshong suk.
U CEM u la ong ba ha ka jingïakynduh bad ki nongïalam shnong, ki la pynsngew shibun ki mat bad na ka liang ka KHADC kaba donlang ha ka Regional Committee, kan sa rah ïa ki jingpynsngew jong ki nongïalam shnong ha ryngkat ki kot ki sla kiba ïadei bad ki jaka ki puta sha ka Regional Committee. U kyrmen ba ka jingïakren pynbeit pud ha ka wat ba-ar yn lah ban pynbeit noh ïa ki jaka kiba don ka jingïakajia pud.
Na ka liang u Deputy CEM, Bah Pynshngaiñlang N Syiem u pynpaw ka jingkmen ban ïoh ïakynduh ïa ki paradoh parasnam ha khappud. U la ong ba ka EC kan sa ïakynduh biang bad ka Synjuk ki Rangbah Shnong ka thaiñ Block-2 ban ïakren kham sani shuh shuh ha ryngkat ka jingpynbiang ïa ki kot ki sla ha shwa ban leit rah sha ka Regional Committee kaba la thaw da ka Sorkar Jylla.
Ha kane ka sngi, nalor u CEM, la don lang ruh u Chairman ka KHADC, Bah Lamphrang Blah, u Deputy CEM, Bah Pynshngaiñlang N Syiem, ki EM kum u Bah Teiborlang Pathaw bad u Bah Rangkynsai Kharbuki, nalor u MLA bad MDC ka Mawhati, Bah Charles Marngar.
