Shillong, Naitung 03:
U Myntri Rangbah ka Jylla, u Conrad K. Sangma ha ka Lah Sngi U Blei u la kren shai ba um pat lah ban ong eiei halor ka Uniform Civil Code (UCC) ïa mynta namar um pat tip ka dei kaei bad don aïu hapoh jong ka.
“Kumba nga la pynsngew ïa ka UCC ha ka por ba nga la kren hashuwa, nga la kren shaphang ka jingpyrkhat halor ka UCC, ka jingmut ka dei kaei kaba ngi la pyrkhat,” la ong u Sangma haba kren sha ki lad pathai khubor.
Ha kajuh ka por, u la kdew ba ïa mynta yn hap ban peit shuwa kaei kaba don hapoh katei ka ‘Bill’ (UCC) bad dei tat haduh kata ka por ban sa lah ban ong ka dei kaei.
“Kum ban shu ai nuksa…lashai lada wanrah ïa ka ‘Bill’ bad lada ka ‘Bill’ ka ong ban pyllait ïa ki ‘Schedule Tribe’ bad ‘Schedule Caste’ jong katto-katne ki jaka ne ïa ka thaiñ Shatei Lam Mihngi na ka…ngin hap ban peit shuwa don aïu hapoh jong ka lane lehse ka lah ban ong ba ki imlang-sahlang kiba bud ïa ka jingai jait sha ka kmie, yn pyllait ïa ki,” la ong u Sangma.
U Myntri Rangbah haba ban biang ba um pat tip don aïu hapoh katei ka ‘Bill’, u la ong ba ka jingpyrkhat ban don ïa ka UCC ka long kaei-kaei kaba lada ym ïakren bad ki nongshong shnong bad ban khmih bniah ïa baroh ki bynta, kan sa long kaba jyrwit-jyrwat.
“Kan long ruh kaei-kaei kaba ki nongshong shnong jong ka thaiñ Shatei Lam Mihngi kin ym lah ban pdiang,” u la ong.
Shuh shuh u la bynrap, “Lada katei ka ‘Bill’ ka don kylluid ki kyndon ki ban ïada ïa ngi, ngin sa lah ban ïakren kham bniah bad peit kumno ngi lah ban ïaid shakhmat bad kane.”
“Tat haduh kata ka por, nga sngew ba ka long kaba eh ban ong eiei halor kane ka bynta namar ngim pat ïohi ka dei kaei bad ngi dang shu ïakren shaphang jong ka da ka jingpyrkhat, ngim pat ïakren halor ka ‘Bill’ kaba shisha,” la ong u Myntri Rangbah.
