Shillong, Naiwieng 01
U Bah Ardent Miller Basaiawmoit, President ka Voice of the People Party (VPP) u la ong, “Haba rung sha ka party, rung da ka nongrim ym ban ban rung da ka jingshongshit.
ïa kane u Bah Ardent u la kren ha ka sngi pdiang burom ïa u Bah Rocky A Marwein ha ryngkat ki nongkyrshan, kiba la wan ban pynïasoh noh bad ka party VPP, ha ka jingïalang kaba la long ha ka 30 tarik u Risaw 2026.
Haba ai jingkren ban pdiang ïa u Bah Rocky bad ki nongkyrshan jong u kiba la mih na ka Congress ha Umsning Auditorium Hall kaba la sakhi ruh ïa ka jingwan u paidbah uba pyndap ïa ka hall, u Bah Ardent u la ong, “Ka VPP ka mih da ka nongrim, kata ban synshar khuid bad ban pynskhem ïa ka jinglong trai”.
“Ha ka jingïaid lynti jong ngi, ymdei ba ngi kop ne sarong hynrei ngi ïohi shai da ka jingngeit ba kata ka por ban wanrah ka jingkylla ka la jan. Ngi ïohi ba u snem 2028, kum u snem ba ka jingkylla ha ka synshar ka khadar kan wan,” u la ong.
“Kam dei ka jingkynduh ba tang shisien bad u Bah Rocky ba u kwah ban rung noh sha ka VPP, hynrei ngi la ïakren la bunsien namar ka party ka kwah ban tynjuh ïa u, halor kaei kadaw ba u kwah ban pynïasoh noh bad ka VPP. Kumta hadien ba ngi ïohi une u samla rangbah u la ïohi ba ka don ka jingïapher hapdeng ka party ba u don mynshuwa bad ka VPP, bad u Bah Rocky um dei u briew uba leh shongshit,” la ong u Bah Ardent.
U la ïathuh ruh ba ka VPP kamdei ba ka shu mih kulmar hynrei kadei namar ba ka don ka jingisynei ïa ki paidbah, ba u paidbah u la shu shah pyndonkam, shah rong ha ka lyer sha kamon bad sha kadiang.
“Haba ngi seng ïa ka VPP, ngi la buh ka thong ban wanrah ïa ka jingkylla bad ngi ïohi ba ki paidbah ki la ai ka jingkyrshan, ban ïoh 4 ngut ki MLA bad u MP uba la khlad noh u (L) Dr. Ricky AJ Syngkon bad ruh ban synshar marwei ha KHADC,” la bynrap u Bah Ardent.
Namarkata, u Bah Ardent u la kyntu ruh ba haba ki wan ban pynïasoh sha ka party, ngi kwah ba kin rung beit namar ba ka nongrim ka khring, ym dei pat da kawei ka rukom pyrkhat.
Kumta, kum ka jingkyntu ïa ki nongbud u Bah Rocky, u Bah Ardent u ong, haba phi la dep rung ha ka VPP mynta phim dei shuh ki nongbud hynrei kum ki nongkyrshan jong ka party.
