Shillong, Naiwieng 01
Ka United Democratic Party (UDP) kan sa lum ïa ka jingïalang jong ka Central Executive Council (CEC) ha ka 3 tarik Naiwieng ban ïatai halor ka jinglong jingman ka saiñpyrthei ha Jylla nalor ka jingkyrshan ïa ka Sorkar Meghalaya Democratic Alliance -II.
Ïa kane la pyntip da u President ka UDP Bah Metbah Lyngdoh haba pynbna ïa ka jingiehnoh kam kum u Myntri na ka kynhun Myntri ka Sorkar MDA-II ha ka sngi Saitjaiñ.
U Bah Metbah u la kren shai ba ka jingiehnoh kam jong u ka dei hadien ba u la sah satang marwei kum u MLA ka UDP da ka jingphet seng noh jong ki 11 ngut ki MLA.
Haba kylli ïa ki sienjam ba un shim hadien, u Bah Metbah u la ong ba ka jingiehnohkam kum u Myntri ka dei ka rai kaba nyngkong, ka rai kaba ar kan long halor ka jingkyrshan ïa ka MDA ka ban sa shim hadien ka jingïakren hapoh ka party.
“Ka rai kan sa mih ha kine ki sngi ban wan hadien ka jingïasyllok bad baroh ki kynhun ba don bynta ha ka kam bad ngin sa shim rai ha ka jingïalang ka CEC ha ka 3 tarik Naiwieng,” u la ong.
U Bah Metbah u la kyntait ban kynthoh eiei la un shong noh sha ka Liang Pyrshah ha ka ïingdorbar, da kaba ong, “Ngan ieh ïa ka ha ka party, ha ki nongkitkam ka CEC ba kin shim ïa ka rai bad ban ai jingmut lang”.
