Nongstoiñ, Naiwieng 01
Ka jingïaid jong ki trok kit palat pud lyngba ka surok Umlieh – Tyllang bad Nongriat kaba dang don mynta hapdeng ka jingpyntrei kala ktah shisha ïa ka ïaid ka ïeng jong ki paidbah namar ka jingdon jong ka jingsahkut jong ki kali.
Halor kane ka bynta, na ka liang ka ka Hynñiewtrep Youth Council (HYC) Umsaw Area Unit, kala pynpaw ba ha ka jingshisha ïa kane, ka seng kala dep ban ujor ruh ha u Executive Engineer jong ka tnad PWD ban nym shah ïaid ïa ki kali heh lane ban kit palat ïa ka 9 ton katba ka surok ka dang don ha ka jingpyntrei.
Shuh shuh ki nongïalam ka HYC ki la ong ruh ba katkum ka jinglap jong ka seng bun kiba dang pynkheiñ ïa katei ka kyndon ba la pynmih da ki bor jong ka District ryngkat ka tnad PWD.
“Kane ka jingleh jong ki kali heh ka la ktah shisha ïa ka ïaid ka ïeng jong ki paidbah bad ruh ka la don ka jingsahkut kali ha shi lynter katei ka surok,” ong ki nongïalam ka HYC da kaba ki la bynrap ruh ba kane ka jingleh ka pynjynjar bad pynsohsat ïa u paidbah uba leit jingleit ban leit sha ïew ne ban leit shim dawai khamtam ïa kiba pang ba shitom.
Ki la ong ruh ba katkum ka jinglap jong ka seng, kiba bun ki jingkieng kiba dei ban ïaid na katei ka jaka, ki la jot lut kim biang shuh, la donkam ban shna thymmai, kumta lada ki kali heh kum ki trok bad kiwei kiwei ki dang ïaid sahuh ïa katei ka surok, kan don ka por ba ki jingkieng kin dkut bad julor lut.
Ka HYC lyngba ki nongïalam kala pynpaw ruh ba ka seng ka dawa na ka tnad PWD kumjuh ïa ki bor pynïaid district ba ki dei ban leh eiei ïa ki kali kiba kit palat pud kiba ïaid lyngba katei ka surok katba ka surok mynta ka dang don ha ka jingpyntrei. “Ngim kwah ba ïa ka kyndon la pynmih bad la pynkheiñ, ki bor district ki dei ban leh ïa kaba donkam ym dei tang ka ktien,” ong ki nongïalam HYC.
