Shillong, Naiwieng 01
U Bah Rocky A Marwieñ, President barim ka Umsning Block Congress Committee (UBCC) bad Ri Bhoi District Congress Committee, ha ryngkat ki nongkyrshan jong u, ha ka 30 tarik u Risaw 2026, ki la pynïasoh ïalade sha ka Voice of the People Party (VPP) ha ka jingïalang ha umsning Auditorium Hall.
Ia ka jingpynïasoh u Bah Rocky bad ki nongkyrshan la pdiang burom da u Bah Ardent Miller Basaïawmoit, President ka VPP, MLA na Nongkrem, ki nongkitkam ka Party bad kiwei-kiwei de.
Haba ai jingkren ha kane ka jingïalang u Bah Rocky u la ïathuh khana shaphang ka jingïakhun jong u, ïa ka ilekshon MDC sha KHADC 2025 na ka party Congress
U la ong ba ka jingïakhun jong u ïa ka elekshon MDC ha katei ka por, kadei ruh hadien ka jingphet noh u Dr Celestine Lyngdoh, MLA ka Umsning ban pynïasoh noh bad ka NPP.
“Nga shah khot da u suri khun bad u Dr Celestine kum u suri kpa, namar ba u la shet ïa ki paidbah kiba la pynjop ïa u na ka Congress ha ka ilekshon MLA 2023 bad ki paidbah ki ong, ba lada u jop ïa ka ilekshon MDC, un sa leh lang kumba leh u MLA,” u la ong.
U la bynrap ba ka jingrung jong u sha ka VPP, kam dei ban ïoh ïa ka tiket banïiakhun ïa ka ilekshon MLA 2028 hynrei ba un ïoh trei bad shakri da ka jingïatreilang bad u paidbah.
U la pynkynmaw ruh ïa ki kyntien ba la kren da u MLA uba la jop na ka Congress, ba hashuwa ka ilekshon u la ong “Lada ki paidbah kin thep ïa ka vote sha ka NPP, kin pynkhlaiñ ïa ka BJP. Dei une u MLA uba ma nga bad ma phi ngi la pynjop”.
U la ther tyngeh ruh ïa u Dr Celestine uba la pynbiej sha ki paidbah hashuwa ban sdang ka ilekshon ha u snem 2023.
