Shillong, Naiwieng 01
U Advocate General (AG) u Amit Kumar ha ka sngi Saitjaiñ u la ong ba u Secretary General ka High Court Bar Association u Kishore Ch Gautam, u la buhrieh ïa la ka jong ka jingmihkhmat kum u nongsaid aiñ ïa u juh u kontraktor bad ïarap ban pynrem ïa ka jingkam ba T.1,588 klur, haba kynnoh pat ïa u ba u pan dor heh.
Haba pynphai kylla ïa ki jingkynnoh ba la mih ha ka 30 tarik u Risaw ba ong ba u Kumar u pan bai muktiar haduh T.1,50,000 shisien mihkhmat ha ki Commercial Court na ka T.20,000 ka dor ba la buh bad ïalam bakla ïa u paidbah, u Kumar u la ong ba kane ka jingkynnoh ka dei kaba bakla bad kaba lamler.
U Kumar ïathuh ba ka Office Memorandum ka Law (B) ba 11 tarik Naiwieng 2018, kaba shaniah da u Gautam dalade, ka la kren shai ba kum kine ki jingïakren kim hap satia hapoh ka OM bad ong ba ka bai muktiar ïa ki kam bym shym la kdew ha ka jingbthah, dei ban ïakut da ka jingïamynjur lang.
Ki lai tylli ki jingïakren pynbeit, u la ong ba kim dei ki mukotduma ba kumne kumtai. Ka BSC-C&C JV ka kynthup ïa ka surok NH-44 Shillong-Nongstoiñ bad surok Nongstoiñ-Rongjeng-Tura hapoh ka SARDP-NE, kaba la khot tender da ka Sorkar Pdeng ha u 2009, ka dor ka mur ka la kiew sha ka T.2,406 klur, 16 valume, 11,000 sla, 80 hearing ha khmat ka Tribunal, Commercial Court, High Court bad Supreme Court. Ka BSCPL ka dei ka surok Garabadha-Dalu ba la bei da ka ADB. Ka Marbaniang ka dei T.1,100 klur ha MUDA Complex ha Police Bazaar. Ka MUDA kam hap satia hapoh ka OM.
“Ka jingkam ba T.1,588 klur kan jin da long T.1,788 klur ryngkat ka sut kat haduh ka 31 tarik Risaw, 2026. Kano-kano ka jingleh bakla kan jin da wanrah ïa ka jingduhnong kaba khraw bha ïa ka pla tyngka u paidbah” la ong u Kumar.
Halor ka jingtreikam kaba khuid ba shai, u la ong ba ïa ka bai muktiar la phah sha u Chief Engineer (NH) ha ka 19 tarik Nailar, 2019 ha shuwa ban poi ka mukotduma sha ka Commercial Court, haba ai jingmut ban mang lypa ïa ka pisa. U Chief Engineer u la phah sha ka Regional Office ka MoRTH kaba la pan ïa ka jingpynshai ha ka 31 tarik Nailar, 2021. Ha ka 8 tarik Nailur, 2021, u la pynksan haba kdew ïa ka jingbun palat ki kot ki sla, ka kyndon 16, Order I Rule 10 bad kyndon 31 (6) application, bad ba ka RLDA ka la thung ïa u ha u 2020 ha ka dor ba T.2,50,000 shisien mihkhmat ha kum kane kajuh ka jingïakren pynbeit.
U ïathuh ba u la ïasaid na ka bynta ka jingtynjuh pyrshah jong ka Sorkar ïa ka Interim Award ba 27 tarik Naitung, 2021 ba bthah ban siew T.75 klur, ba la pynsangeh ha ka 29 tarik Risaw 2021, bad ka Commercial Court ka la ai por ïa ka jingïakren pynbeit.
U Kumar u la ong ba ka Tribunal ka la kyntait ïa ka jingkam ba T.1,470 klur-T.313 klur ka jingkam dier por jong ka BSC nalor ka sut bad baroh ki jingkam jong ka BSCPL bad Marbaniang-bad ai ïa ka rai ban siew sha ka Jylla T.13 klur.
U ïathuh ba ki kontraktor ki la thung ïa ki muktiar kiba paw bha na shabar ka Jylla, u wei na ki u dei u Hazarika u ba kam T.2.37 klur ka jingsiew bym pat siew na ka BSC-C&C JV ha khmat ka Commercial Court.
Haba ther kylla ïa u Gautam, u Kumar u la ong, “U dei u nongïasaid aiñ na ka bynta ka BSC-C&C JV ha ka mukotduma Arb A No. 6 of 2023, ka hukum kaba la pyni ha ki lad pathai khubor bad u nongsaid aiñ na ka bynta ka BSCPL ha ka Arb P No. 1 of 2021, 2 of 2024, 1 of 2025 bad ka writ appeal ba la mudui lyngba jong u ha u Kyllalyngkot 2026. U la dei ban pyntip sha ki lad pathai khubor ïa ka jingdon bynta lang jong u”.
U ïathuh ba ka ejahar 286 (9)/2024 ha Sardar PS ba 10 tarik Nailur 2024 hapoh ka kyndon 120B, 409, 420, 465, 468, 471, 477A IPC bad 13(2) PC Act pyrshah ïa ka JV, ki paralok bad ki nongtrei kaba la pynshong nongrim na ki kot jingkheiñ ba pyni ïa ka kyiad bad ki jingai sngewbha ba rem dor sha ki Engineer, ki Nongtrei ka MoRTH, bad ki dkhot ka DRB ka dang don hapoh ka jingtohkit, ka ED ka la khot hajir ïa u Chief Engineer barim hapoh ka PMLA. Ïa ka JV la blacklist haduh 5 snem ha ka 3 tarik Nohprah, 2024, pynksan biang ha ka 17 tarik Nohprah, 2025 bad kyntait ïa ka jingkyrpad ban bishar biang ha ka 19 tarik Rymphang, 2026 ha kaba la kdew ba ki jingthoh ha ka ledger ki dei ki nongrim kiba pyni ïa ka jingsiew pisa be-aiñ ban ïoh jingmyntoi, ym dei ba la leh ïa kane na ka jingmut sniew.
U ong ba ha ka mukotduma CMJ University, ki Special PP ki la ïoh ïa ka jingsiew ba T.1 lak bad T.75,000 shisien mihkhmat-palat T.2 lak ha ka shisngi ha ka Ïingkashari Magistrate watla kam don kano-kano ka jingdawa pisa kaba heh, hynrei u Gautam um shym la kylli jingkylli halor kane.
Haba kynnoh ba pyndonkam bakla ïa ka rynsan jong ka Bar Association na ka bynta ka jingshun shimet, hadien ba u AG u la ai jingmut ban pan jingpynshai na u Special PP ha ka mukotduma Raja Raghuvanshi, u ba dei para jong u Gautam, u Kumar u la kdew ïa ka shithi jong u President ka Bar Association ba 1 tarik Risaw, 2026, kaba la pynpaw ïa ka jingthmu shimet jong u Gautam.
