Ka Meghalaya ka la nang duk namar ba ka pisa pynroi ka leit tang sha ki katto katne ki kontraktor: Pala

Shillong, Naiwieng 01

U President ka Meghalaya Pradesh Congress Committee (MPCC), Bah Vincent H Pala u la ong, ka Jylla Meghalaya ka la nang duk namar ba ka pisa jong ki kam pynroi kam shym la saphriang sha ki paidbah, hynrei ka leit tang sha ki katto katne ngut ki nongïalam kiba shong ha ka kynhun Myntri jong ka NPP.

U Bah Pala u la ong ba ka Congress ka la duh bor hadien ba ka la rem ha Delhi bad bun ngut ki nongïalam kiba wad jingmyntoi shimet ki la ïehnoh ïa ka party. “Namar ba ngim don shuh ha ka bor synshar ha Delhi, bun ki la shim kabu, ki la ïehnoh ïa ka party bad pynïasoh sha kiwei pat ki party,” u la ong.

Shuh-shuh u Bah Pala u la kdew ruh ba bun na ki Myntri kiba mynshwa kiba don ha ka Congress mynta ki don ha ka Sorkar NPP. “Phi peit ïa ki Myntri kiba mynshwa ki don ha ka Congress, mynta ki dei ki juh kiba don ha ka NPP, u Bah Prestone, Bah Sniawbhalang kiba dang bteng mynta, Kong Ampareen bad Bah Comingone Ymbon kiba la shah pynhiar noh. Kito kiba mynshwa ki don ha ka Congress, mynta ki dei ki juh kiba don ha ka NPP. Kumta ka Congress ka la tlot namar ki briew jong ngi hi hapoh ka party ki la shet kylla ïa ngi. Wat kito kiba don ha ka TMC ruh ki dei kiba mih na ka Congress,” u la ong bad bynrap ba kane ka jinghiar jong ka Congress ka dei namar ka jingkhwan myntoi shimet jong ki nongïalam.

Haba kren halor ka rukom pynkhlaiñ biang ïa ka Congress, u Bah Pala u la ong ba ka party kan pynkhreh ïa ki samla pule kiba la biang ka jingnang jingstad bad kan bishar ruh ïa ka jinglong ba shisha, ym tang ïa ka jinglah ban jop ilekshon ha ka por kaba lyngkot, hynrei ka party ka peit ïa kaei kaba bha ha ki por ban wan.

U la ong ba ka party ka don ki nongtrei ha kylleng ka jylla ngi don ki nongtrei party kiba don bynta ha ka niam, la ki dei ki Katholik ne ki Presbyterian ne ki Seng Khasi, lane kiba don ia ka kolshor kaba jylliew bad kaba tip ia kata ka riti dustur. pyniap bad pynjot ia ka imlang sahlang,” u la ong.

U la ong ba ka party kan wad ïa ki nongtrei kiba tip ïa ka niam, ka kolshor, ka riti dustur bad kiba don ka mynsiem briew. U la kdew ruh ïa ki kynhun niam bapher bapher kum ka Catholic, Presbyterian bad Seng Khasi.

U la pynpaw ba ka jingbamsap ka pynjot ïa ka imlang sahlang bad ka dei kawei na ki daw ba ki jingeh kum ka jingpur sted jong u drok ki nang jur.

U la kynnoh ruh ba ki pulit kiba trei shitom ban bat ïa ka jingkhaii drok bunsien kim shah ai jingïaroh, hynrei ki shah pynkynriah kam. Kane, u la ong, ka ktah ïa ka jingtreikam jong ka aiñ bad ka jingshngaiñ jong ki paidbah.

U la ban jur ba ki nongtrei jong ka Congress bad ki ophisar sorkar ki dei ban don ïa ka jinglong tip briew tip blei, ka akor bad ka jingtrei hok.

U Pala u la pynpaw ïa ka jingshaniah ba ka Congress kan lah ban wanphai biang sha ka bor synshar, hadien ba u la ïohi ïa ka jingduk jong ki paidbah ha ki shnong nongkyndong.

U la ong, “Nga don ka jingshaniah kaba pura ba ki paidbah kin wanphai biang sha ka Congress, namar haba phi leit sha Nongkyndong bad kiwei ki shnong, phi lah ban ïohi ba ki paidbah ki la duk shisha. Ha ka por jong ka Congress, haba don kino kino ki kam pynroi, ki paidbah ki ïoh jingmyntoi na ki.”

U la pynshai ba um ong ba ka sorkar mynta kam pyntrei ïa ki kam pynroi, hynrei ka jingeh ka long ba ka jingmyntoi na kita ki kam kam shym la poi sha ki paidbah paidbah.

U la ai nuksa ïa ka jingtei surok, ha kaba mynshwa bun ngut ki briew ki ïoh kamai na kawei kawei ka kam, kum ki nongdie byrni, ki nongdie dewbilat, ki nongdie maw bad ki nongpynpra maw. Kumta, ka pisa ka ïaid na uwei sha uwei pat bad bun ngut ki ïoh kamai.

Hynrei mynta, u la kynnoh ba tang katto katne ngut ki briew kiba ïoh ïa ki kontrak surok ki long ruh ki trai petrol pump, ki trai kali bad ki trai crusher. Kumta ka pisa ka leit tang sha kajuh ka kynhun briew, katba ki paidbah ki dang sah ha ka jingduk.

U la ong, “Kito kiba ïoh ïa ka kontrak surok, ki dei ruh kiba don ïa ki petrol pump, ki kali bad ki crusher. Ka pisa ka leit tang sha kajuh ka liang, bad dei na kata ka daw ba ki paidbah ki dang duk. Hynrei ha ka por jong ka Congress, kam long kumta.”

U Pala u la pynïadei ïa ka jingduk bad ka rukom thaw policy jong ka sorkar. U la ong ba lada ka sorkar ka thaw ïa ki policy ban kyrshan tang ïa kiba riewspah, tang katto katne ngut kin nang riewspah. Hynrei lada ka sorkar ka thaw ïa ki policy ban ïarap ïa kiba duk, ki paidbah kin ïoh kamai bad jingïoh jingïarap.

U la ai nuksa ïa ki kam kontrak, ha kaba ka sorkar ka lah ban phiah ïa ka kam shna surok 100 kilometre sha ki bynta bapher bapher, ban ai lad ïa bun ngut ki briew ban ïoh kam bad jingïoh kamai. Hynrei lada ai ïa ka kam baroh 100 kilometre tang ha ka kti jong uwei u briew, tang uta u briew u ïoh jingmyntoi.

U la ong ba kane ka dei ka rukom treikam jong ka sorkar kaba pynmyntoi tang ïa kiba khyndiat.

Ha kaba kut, u Pala u la ong ba ban pynim biang ïa ka Congress, ka party kam lah ban shaniah tang ha ki nongtrei jong ka, hynrei ka dei ban leit sha ki paidbah, sngap ïa ki jingeh jong ki bad sngewthuh ïa kaei kaba ki kwah.

U la ong ba ki paidbah ki la ïohi ïa ka jingïapher hapdeng ka por ba synshar ka Congress bad ka por mynta. Katkum ka jingong jong u, mynshwa ka spah ka saphriang sha baroh, hynrei mynta ka leit tang sha katto katne ngut.

U la pynkut da kaba ong ba um len ba ki paidbah ki dang ïoh pisa na ki kam pynroi mynta, hynrei ka jingkylli ka long shaei kata ka pisa ka leit. Ha ka por mynshwa ka leit sha ki paidbah, hynrei mynta ka leit sha tang katto katne ngut.

U la pynpaw ba ka jingshaniah jong ki paidbah ka long ka nongrim kaba kongsan tam ban pynkhlaiñ biang ïa ka Congress.