Shillong, Naitung 03:
Ka Khasi Students’ Union (KSU) Shillong Mihngi Circle ka la maham tyngeh ïa ki bor pynïaid ka North East Institute of Ayurveda & Homeopathy (NEIAH) ba kim dei satia ban thung kam ïa ki briew nabar jylla.
Ki dkhot ka KSU Shillong Mihngi Circle hapoh ka jingïalam u President u samla Sonstar Nongkhlaw ha ka sngi Nyngkong ki la leit ban ïakynduh ïa ki bor pynïaid ka NEIAH hadien ba ki la ïoh jingtip ba ka Director jong kane ka skulbah ka la thep kam jubor ïa kawei ka briew na Uttar Pradesh kum ka Contractual Attendant.
Haba ban jur halor ka jingdonkam ban phai khmat shwa sha ki samla trai jylla, ki dkhot ka seng ki la maham ïa kane ka skulbah bad dawa ba ka dei ban weng noh mardor ïa katei ka briew kaba nabar bad dei ban thep beit da ki Khasi ha ki kam contractual baroh.
Ki dkhot ka seng ki la mana ruh bym dei ban pynskhem kam jubor ïa kino kino ki bar jylla ba trei contractual ha NEIAH. Ka seng ka maham ruh ba lada ki bor pynïaid ka NEIAH khamtam ka Director kim weng kam ïa katei ka bar jylla, ka seng kan sa shim da ki sienjam kiba tyngeh.
