Guwahati, Naitung 03:
Uwei u briew u la shah khrai-khlieh katba 3 ngut kiwei pat ki la shah siat ïap ha Manipur ha ka Sngi U Blei katba ka jingïakynad ka la ïaid la 60 sngi mynta wat hapdeng ka jingdon jong 36,000 ngut ki bor ïada ka Sorkar Pdeng hapoh ka Jylla.
Ka tyllong khubor ka ong ba 3 ngut ki Meitei, kiba dei ruh ki ‘Volunteer’ Shnong ki la shah pynïap ha Khuijuman Tabi, Bishnupur distrik (ba bun ki Meitei) namar ka jingsiat na ki jaka lum, kaba kdew ïa ka jingsiat kaba wan na ka distrik ba marjan – Churachandpur (ba bun ki Kuki) ha ka por shiteng synñia.
Kitei ki jingïap ki la ïalam sha ka jingshah thombor jong 2 tylli ki shnong Kuki — Langza bad Chinglangmei — ha Churachandpur hapdeng 3.30 bad 4 baje mynstep ha kaba ka jingkhrai-khlieh ka la jia, bad kumba 30 tylli ki ïing ki la shah wiang ding, la ong ka tyllong khubor.
Ka Indigenous Tribal Leaders’ Forum (ITLF), ka kynhun ki jaidbynriew Kuki-Zo jong ka Churachandpur, ka la pynithuh ïa utei u briew kum u David Hmar.
“Ki nongthombor ki la mait ïa ka ryndang jong u bad wah ïa ka khlieh jong u halor ka jingker, ha shuwa ban bret dusmon ïa ka met jong u ha kawei na ki ïing kaba ing. Kane ka jingleh ’riewkhlaw ka kdew shai ïa ka jingbym kheiñ shuh ïa ka jingim briew bad ka jingbym burom shuh ïa ki jaidbynriew trai-ri…,” la ong ka ITLF ha ka kyrwoh.
Ka ITLF ka la ong ruh ba ki don 5 ngut ki briew kiba la shah rahbor hynrei ki bor ba dei khmih kim shym la pyntikna ïa kane haduh ka Sngi U Blei janmiet.
Katei ka jingïakynad haduh mynta ka la shim noh ïa kumba 138 tylli ki mynsiem ba kordor na ki Meitei bad Kuki bad pynsakma ïa 60,000 ngut ki briew.
Ka tyllong khubor ka ïathuh ba ki kitei ki ‘Volunteer’ ki dang ïada ïa ka shnong jong ki (Khuijuman ha Bishnupur) naduh ba ka jingïakynad ka la sdang ha ka 3 tarik u Jymmang.
Ka la ong ruh ba kumba 3,000 ngut ki nongshong shnong ki la ïalum ban dawa na u Myntri Rangbah bad nongïalam ka BJP, u N. Biren Singh ban leh eiei pyrshah ïa ki lehnoh Kuki, ban kem ïa kito kiba donkti ha ka jingthombor bad ban pyntikna ban pynkut noh kloi ïa ka jingïakynad.
U Singh ha ka Sngi U Blei u la leit sha katei ka shnong ban khmih bniah ïa ka jinglong-jingman bad pynlut por kumba 4 kynta eiei ha katei ka jaka – ban leit jngoh ïa ka jaka jong ka jingjia bad ban ïakynduh ïa ki bahaïing jong kiba la khlad noh.
“Ka jinglong-jingman ka la kham biang khyndiat namar ka jingwan jngoh jong u Myntri Rangbah,” la ong ka tyllong khubor.
Haba kylli la u Myntri Rangbah un jngoh ne em ïa ka distrik ba marjan – Churachandpur ba don ka shnong kaba la jia ka jingshah khrai khlieh, ki tyllong khubor ki la ong ba ka jinglong-jingman kam long kaba biang ïa u ban leit jngoh ïa katei ka ka distrik (ba bun ki Kuki) namar ki kynhun seng Kuki ba kynthup ïa ka ITLF, ki kynnoh ïa ka Sorkar jong u halor ka jingïakynad kaba dang bteng haduh mynta.
Ka ITLF, kaba la dawa ïa la ka jong ka bor synshar na bynta ki Kuki-Zo kumba long lem kiwei ki kynhun Kuki ki la kyntu ïa ka President ka India, u Myntri Rangbahduh ka ri bad ki Myntri Sorkar Pdeng ban shim ïa ka rai ban leh eiei noh kloi khnang ban pynshitom ïa kito kiba donkti ha kitei ki kam be-aiñ.
“Balei ym pyntreikam ïa ka ‘President’s Rule’ haduh mynta? Hato ka Sorkar Pdeng ka ap ïa ka Jylla ba la kyrshan da ki Meitei ba bun paid ha ka Sorkar Manipur ban pyndep ïa ka jingpynïap lut ïa ki jaidbynriew trai-ri? Nalor kane, ngi khot ïa ki kynhun jaidbynriew hapoh ka ri bad shabar ri kumjuh, ki kynhun halor ki hok longbriew-manbriew bad kito kiba don ka jingsngewkhia ban ïatylli lang kawei ha ka ban pynrem jur ïa kane ka jingleh da ki Meitei,” ong ka ITLF.
