Tura, Naitung 04:
Halor ka jingkiew ka dor jong ki mar bam, u nongïalam ka TMC, u Richard Marak ha ka Sngi Ba-ar u la buh jingkylli halor ki sienjam ba la shim da ka Sorkar haba ïadei bad kane ka bynta.
“Ka jingkiew dor ba dang shen jong u khaw ka la pynlyngngoh ïa uba bun balang kumno kin lah ban pynbiang ïa une u mar bam. Ngi sngewkhia halor ka jingkiew dor ba dang shen jong u khaw uba long u mar bam uba ngi ïa bam lut baroh. Ka jingkiew ka dor na ka T.32 shi kilo sha ka T.40 shi kilo na bynta u khaw uba die paidbah (uba tad) bad na ka T.40 shi klio sha ka T.50 shi kilo na bynta u ‘Parimal’ ka buh jingeh shi kat dei ïa kiba bun ki longïing. Ym tang kine, ka dor jong kiwei pat ki jait khaw ka la kiew ha kine ki khyndiat bnai ba la dep hadien ka ilekshon,” la ong u Marak.
Na ka liang u Marak u kwah ban tip kaei kaba ka Sorkar ka leh ban pynjem ïa ka dor jong u khaw bad pyntikna ba un long uba suk ban ïoh na bynta baroh khlem da ieh noh ïa u ’riew paidbah ban trud ka dieng ka maw tang ban thied ïa une u mar bam.
“Ka long kaba donkam ïa ka Sorkar ban sngewthuh ba ka jingkiew dor u khaw ka ktah ïa baroh khamtam ïa kito kiba don jingeh ha ka liang ka ïoh ka kot. Kum u mar bam uba baroh ki ïa bam, ka dor jong u khaw ka dei ban long kaba biang na bynta baroh ki nongshong shnong. Ka Sorkar ka dei ban phai khmat ban pyntreikam ïa ki kyndon ban tehlakam ïa ka dor ka mur ne ban pynduna dor khnang ban pyntikna ba ka dor jong u khaw kan long kaba biang na bynta baroh khlem da peit ïa ka jingïoh jong ki. Ka long ruh kaba donkam ïa ka Sorkar ban khmih bniah ïa ka daw tynrai jong ka jingkiew dor bad ban shim ki lad ki lynti ban khang lad ba kan ym jia biang hadien-habud,” la ong u Marak, da kaba bynrap ba ym lah ban pdiang satia ïa kane bad dawa ba ka Sorkar ka dei ban leh eiei noh mardor.
