Shillong, Naitung 04:
Wat la ka pung Umïam ka la kiew biang haduh 13.16 phut hadien 12 sngi ba don ka jinghap slap, hynrei ka tnad MeECL kam pat pynkut ka jingpynlip bording hapoh ka jylla.
Ïa kane ka jingkiew um biang ha katei ka pung la sakhi ha ka 22 tarik Jylliew, 2023 hadien ba U Nongsaiñ Hima u la ban leit ringdur bad shem ba ka la kiew haduh 21 phut.
Mynta ka sngi ka 4 tarik Naitung, 2023 ka Umïam ka la kiew 13 phut namar ka la poi 3199.16 phut lada ïanujor ha ka 22 tarik Jylliew, 2023 ba ka poi 3186.33 phut.
Ha kane ka sngi la ïohi ba ka um ka la tap ïa ki maw bad khyndew kiba la sdang paw ha kine ki bnai ba la leit namar ka jingrang tyrkhong ka suiñbneng .
Na ka jingdap ka Umïam ki paidbah kiba ïaid sharum shaneng ki khmih lynti ba ka MeECL kan pynduh noh ka jingpynlip bording khamtam ha ka por miet shiteng synñia bad ha ka por nohphai sngi.
Ka jinghap u slap ha kine ki sngi ha nongbah Shillong ka la ai jingkyrmen ïa ki paidbah hapoh ka jylla namar ka jingjyrngam biang ka pung Umïam lada peit na jaka jngohkai pyrthei na Ryndang Briew namar ka surok rim ym shym la ïohi shuh ba la tap da ka um.
