Shillong, Naitung 04:
Ki kali ha Meghalaya khamtam ha East Khasi Hills district ki la nang bun, bad kum ka district kaba ïoh lang ïa ka Shillong kum nongbah jong ka Jylla, ka jingdon ki kali kamai ruh ka la nang bun ha kine ki khyndiat snem.
Ka Shillong ka dei ruh ka nongbah ha kaba ki kali na kiwei ki Jylla ki wan ïaid lyngba ka surokbah-6 (national highway-6).
Haba phai sha ki taksi kamai, ka jinglum jingtip kaba U Nongsaiñ Hima u la ïoh, ka pyni ba ki taksi kamai kiba hap ha Shillong Region kaba mut kiba hap ha East Khasi Hills district ki don 5,336 tylli, katba ki Auto Rickshaw ki don 194 tylli ha Shillong Region.
Ki Auto Rickshaw kiba kham bun ki dei kiba kamai na Mawlai sha Ïewduh bad Polo.
Kane ka jingkheiñ ka dei kaba la ïoh lum tang halor ka jingdon ki kali kamai kum ki taksi, auto rickshaw, ki bos kamai, nalor ki bos kiba dei jong ki jaka pule.
Ki Shillong City Bus kiba kamai ha Shillong kiba wan na thaiñ Smit bad Tynring ki don 35 tylli, katba ki mini bos kiba kamai sha ki khapsor bad ki shnong ha East Khasi Hills district kiba don kham jngai na Shillong ki don 86 tylli.
Ki bos kiba dei jong ki jaka pule bapher bapher ha Shillong ki don 17 tylli.
Ki dang don shuh sa kiwei pat ki kali kamai kiba rong stem kiba ju kamai na kylleng ki shnong sha Shillong nalor ki sumo kiba kamai na Shillong sha kiwei ki district kum sha Jowai, Nongstoiñ, Nongpoh, Mairang, Mawkyrwat bad kiwei kiwei ki shnong.
Dang shen ki bor ba dei peit ïa ka tnat Transport ki la shim ïa ka sienjam ban pyntreikam ïa ka rukom kamai kaba pud sngi katkum ki ‘odd even’ nombar tang ha Khyndai Lad bad Motphran ban pynduna ïa ka dheng kali ha kine ki jaka paidbah kiba bun bha ki paidbah nongshong kali.
Ka jingwanrah ïa kane sienjam ka long ban ailad ïa ki taksi ba kin kamai laitluid ha kine ki ar tylli ki jaka namar lada bun palat ki taksi kiba tur shisien tur sha kine ki jaka, ka dheng kali ruh ka nang jur bad slem, na ka daw ba ki taksi ki hap ban sangeh kham slem haba pynhiar bad kyntiew ïa ki nongshong kali.
