Shillong, Naitung 04:
U Myntri Rangbah ka Jylla, u Conrad K. Sangma ha ka Sngi Ba-ar u la ïakynduh ïa u Myntri ka tnad pule-puthi ka Sorkar Pdeng, u Dharmendra Pradhan ha nongbah New Delhi ban kyrpad shim khia halor ki mat kiba ktah shi kat dei ïa ki samla pule ka Jylla.
U Sangma u la kyrpad ruh ïa u Myntri ban pynmih ïa ki jingbthah sha ka tnad bad NTA ban pynlong ïa ka eksmain kaba kyrpang halor ka Common University Entrance Test (CUET) na bynta kito ki samla pule ka Jylla kiba la duh ïa ka lad ban thoh ïa katei ka eksamin namar ka jingngat ban thoh ïa katei ka eksamin (CUET) ha ki jaka thoh eksam shabar ka Jylla.
“Ngi la kyrpad ïa ka Sorkar India ban shim khia lem ha ka ban pynïeng ïa ki jaka thoh eksamin CUET ha baroh 12 tylli ki distrik jong ka Jylla ha ki shlem ai jinghikai kiba bit ba biang ha ka liang ki jingdon-jingem bad kiwei-kiwei ki jingdonkam ba ïadei bad ka CUET,” u la ong.
Na bynta ka jingshim khia ba mardor jong ka Sorkar Pdeng, ka Sorkar Jylla ka la ai jingmut ban pynïeng ïa ki jaka thoh eksamin CUET ha Shillong, Tura, Jowai, Nongstoiñ bad Williamnagar ki ban kdup lang ïa kiwei-kiwei ki distrik ba marjan.
Ha katei ka jingïakynduh, u Sangma u la kdew ruh halor ki jingeh ba ïakynduh na ka por sha ka por da ki shlem ai jinghikai ïa ki nonghikai (Teacher Training Institution) hapoh ka Jylla ha ka ban kyntiew (upload) ïa ki kot ki sla donkam katkum ka jingdonkam ba la buh da ka NCTE.
Ha kajuh ka por, u la pynsngew ruh halor ki jingduna ha ka ‘website’ ka NCTE kaba kdew beit ïa ka jingbakla ne ‘error’.
Nalor kane, u la ong ba ka Sorkar India ka long kaba jynsur mynsiem ban pynïeng ïa ka shlem ai jinghikai jong ka NERIE hapoh ka Jylla, kaba ïa mynta ka kdup tang 50 ngut ki samla pule haba ïadei bad ka jingpule ‘B.Ed’ na bynta ka thaiñ Shatei Lam Mihngi baroh kawei.
Ha kawei ka liang, u la kdew ruh ba ki don tang khyndiat tylli ki jaka ba la mang na bynta kito ki samla pule ba angnud ka Jylla haba ïanujor bad ki samla pule na kiwei pat ki Jylla.
Shuh shuh u Myntri Rangbah u la kyrpad ïa u Myntri ban wad ki lad ki lynti ha ka ban kyntiew ïa ka jingpynrung klas ha NERIE, Meghalaya khnang ba ki samla pule na baroh ki Jylla khamtam na Meghalaya kin ïoh lad ban pule ha katei ka shlem ai jinghikai.
