Nongstoiñ, Naitung 04:
U Rt. Rev. Bishop Wilbert Marweiñ jong ka Nongstoiñ Diocese u la pynpaw da kaba buh jingkylli ba lada don katta ka jingkajia hapdeng ki ar jaidbynriew balei ban ba hap da pynjot ïa ki ïingmane bad balei ïa ki ïing ki sem bad hato ka dei kata ka bynta na ka daw ba ïa kajia ban shu pynjot ïa ki ïingmane.
Ïa kane na ka liang u Bishop Wilbert Marweiñ u la kren ha ka jingïalang jong ka Catholic Faithful of Nongstoiñ Diocese ha Madan New Nongstoiñ hadien ka ‘Peace Rally’ ha sor Nongstoiñ ha ka Sngi Ba-ar jong ka taïew.
U la ong ruh ba kane ka jingleh ka pynpyrkhat ïa ki briew ba ka lah ban don kaei-kaei sha lyndet ne ka jingthmu jongno-re-jongno kiba kwah ban pynjot bad pynpra da kaba wanrah ïa ka jingkajia bad umsnam da ki hapdeng ki trai shnong trai muluk.
U Bishop u la kyntu da kaba ong “Ko ki hynmen ki para to ngin long kiba husiar namar don bun ki briew kiba sniew sha lyndet kiba wanrah ïa ki jingkajia hapdeng jong ngi kiba dei ki trai shnong trai muluk ban poi ha ki jingïashoh ïa umsnam iwei-ïa-iwei pat ba kin rkhie sha lyndet.”
U la ong ruh ba dei ban long kiba husiar namar kane ka dei kaei-kaei kaba la thmu da mano-re-mano na lyndet kaba ym lah ban shemphang.
Shuh shuh u la ong ruh ba kumba la paw mynta ha Manipur ka jingkajia ka dei tang hapdeng ki ar jaidbynriew hynrei sha lyndet ka don kaei-kaei kaba la wanrah ïa ka jingthmu ban pynjot ïa ki khun, ïa ki ïingmane jong ki Khristan.
