Jowai, Naitung 04:
Ban pynshlur ïa kiba bun ki samla pule, u MLA ka Jowai u Wailadmiki Shylla u la pynbna ban ai khusnam da ka ‘Laptop’ ne song pisa ïa kino-kino ki khynnah hapoh ka 2-Jowai Constituency kiba rung ha ka ‘Top-20’ jong ka eksamin SSLC.
Ïa kane u Wailadmiki Shylla u la pynbna haba kren kum u kongsan ha ka jingïalang sam khusnam ïa ki khynnah kiba la ‘pass’ bha lyngba ka jingïarap na ka ‘SSLC Free Coaching Program 2022’.
Kane ka ‘Free Coaching’ ka dei kaba la sdang da u nongthaw aiñ ka Jowai mynshem snem kyrpang tang na bynta ki khynnah klas 10 kiba shah ktah ha ka khlam COVID-19 bad ki ba ïaleh ïa ka eksamin SSLC-2023 ha artylli ki Sobjek ka ‘Science’ bad ‘Mathematics’.
La sdang ïa ki jinghikai ha ki ar bnai ha ki 5 tylli ki Center kynthup ha Sohmynting, Chutwakhu, Ladthadlaboh, Mihmyntdu bad Mukhla.
U Wailadmiki Shylla haba kren shuh shuh u la pynbna ba ïa kane ka ‘Free Coaching’ un bteng ïa ka man u snem katba u dang long kum u MLA.
U la ai mynsiem ruh ïa ki samla kiba ïoh pdiang ïa ka khusnam ba ki dei ban dang trei shitom shuh-shuh ha ki jingpule ba kham shalor na ka bynta ka lawei ba phyrnai ha ka jingim jong ki, namar kane ka dei ka jingsdang jong ka jingim jong ki.
Ha kane ka sngi la pynkup burom ïa 11 ngut ki samla pule kiba la ‘pass’ bha bad ïoh ‘Distinction’ lyngba ka jingïarap ka ‘Free Coaching Program’ bad ïa ki 3 ngut ki samla kiba la rung ha ka thup ‘Top 20’ jong ka eksamin SSLC bad ka Larisa Lamin kaba rung haka ‘Top-10’ jong ka eksamin HSSLC (Arts Stream).
Ïa ka jingïalang la pynïaid da u Hynniewki Pasleiñ bad la ïoh ka jingkren pdiang burom na u E. Suting Program Coordinator ha ka jingdonlang ka District School Officer, West Jaintia Hills District ka Kong A.P. Syiem, u Principal ka Thomas Jones Synod College, u Dr. D.G. Lyngdoh, u Principal ka North Liberty Higher Secondary School u Richard B. Uriah.
Ïa ka jingïalang la pynwai da ki kyntien ai khublei na u Nominated MDC JHADC u Octomewot Lamin.
