Shillong, Naitung:
Ka shlem treikam u Deputy Commissioner (Excise), East Khasi Hills District, Shillong ka la pynlong ïa ka jingpyntreikam ban ïakhun pyrshah ïa ka jingdie beaiñ ïa ka kyiad pyrsi bad ïa ka kyiad phareng, ki Wine bad kiwei pat ki jingdih pynbuaid bad ki la pynlong ïa ka jingleit khynra ha kiba bun ki Restaurant bad kiwei pat ki jaka bam jaka dih kiba don ha ki bynta jong ka nongbah.
Ha u bnai Jymmang, 2023 ki nongtrei jong ka tnat Excise ki la lap ïa 13 tylli ki jingjia bad ïoh ban kurup haduh 22.100 liter ka kyiad pyrsi bad 46.885 liter ka kyiad phareng. Ha kaba ïadei bad kine ki jingjia ki la don kumba 12 ngut ki briew kiba la shahkem hapoh ka jingtreikam ka Excise Act.
