Shillong, Naitung 04:
Ki nongmudui pyrshah ïa ka jingtih, jingkit dewïong be-aiñ ki la pynpaw ha ka Meghalaya High Court ba ki la shah byrngem bad ki don ka jingsheptieng ïa ka jinglong shngaiñ ka jingim jong ki hadien ba ki la wanrah ïa ki mukotduma.
Ha ka Sngi Ba-Ar, haba bishar ïa ka mukotduma kaba ïadei bad ka jingtih bad jingkit dewïong be-aiñ, ka High Court ka la pynpaw ba ha ka 3 tarik Naitung, 2023, uwei u nongmudui ïa ka ‘Public Interest Litigation’ (PIL) u la kam ba u la shah byrngem ha uwei na ki ‘kingpin’ lane u briew uba donkti bha ha ki kam be-aiñ ha kaba ïadei bad u dewïong lada u ïaid shakhmat bad ka mukotduma.
Ka High Court ka la ong ba uta u nongmudui, ha ka 6 tarik Naitung, 2023, un hap ban ai da ka jingthoh (Affidavit) ban pynpaw ha kano ka rukom u la shah byrngem bad uei uta ne kita kiba la byrngem ïa u.
Nalorkata, sa uwei pat u nongmudui mukotduma ha kaba ïadei bad ki kam be-aiñ ha ka jingtih bad jingkit dewïong, u la pynpaw ha ka High Court ba u don jingsheptieng ïa ka jinglong shngaiñ ka jingim jong u.
“Ngi kyrmen bad ngi tharai ba ka jingsynshar ha Meghalaya ka dang long katkum ki kyndon aiñ watla ka don ka jingpynkheiñ kaba im-im peit-peit da ki bor sorkar bad pulit ïa ki hukum ka Supreme Court halor ka jingkhang ban tih dewïong be-aiñ,” la ong ka High Court.
Ka la ong ruh ba lada jia eiei, wat tang khyndiat ruh, ïa kino-kino ki nongmudui halor ki kam kiba ïadei bad ka jingtih bad jingkit dewïong be-aiñ lane ka jingtreikam be-aiñ jong ki karkhana thang dewïong, ka sorkar jylla kan hap ban shim ïa ka jingkitkhlieh.
