Guwahati, Naitung 04:
Arngut ki briew ki la duh noh ïa ka jingim hadien ba ki maw kiba heh ki la tyllun nalor lum bad rat ïa artylli ki kali bad ban ïa kawei pat na ka daw jong ka jingtwa khyndew ha Nagaland ha ka Sngi Ba-Ar.
Nalor kiba khlad, ki la don sa lai ngut kiba la mynsaw jur ha katei ka jingjia kaba la jia ha ka por kumba 5 baje janmiet. Kane ka la jia ha ka surokbah (National Highway 29) ha Chumoukedima district, hapdeng ka Dimapur bad ka Kohima.
Ka la don ka dur khih (Video) kaba la saphriang bha ha kaba ïadei bad katei ka jingjia bad la ïohi ba u maw uba heh u la pynjulor ïa artylli ki kali bad hadien kata u la ban sa ïa kawei pat ka kali.
Ha kane ka jingjia uwei u briew u la khlad hashen, katba uwei pat u la khlad katba dang ai jingsumar ha Hospital. U la don ruh uwei u briew uba la sahkut hapoh kawei ka kali bad ka jingpyrshang ban sei ïa u ka dang ïaid haduh ba thoh ïa kane ka khubor.
Katei ka jaka ba la don ka jingjia ka dei kaba la tip kum ka “Pakala Pahar” bad ki jingtwa khyndew ki ju jia na ka por sha ka por, la ong u Myntri Rangbah ka Nagaland, u Neiphiu Rio ha Twitter.
“Mynta ka sngi ka la don ka jinghap maw ha National Highway ha ka por kumba 5 baje janmiet hapdeng ka Dimapur bad Kohima ha kaba arngut ki briew ki la khlad bad lai ngut kiwei pat ki la mynsaw jur. Ïa kane ka jaka la ju tip kum ka “Pakala Pathar” bad ka jingtwa khyndew bad jinghap ki maw ka ju jia na ka por sha ka por,” la ong u Rio.
U Myntri Rangbah u la ong ba ka sorkar ka la shim ïa ki sienjam ban ai jingsumar ïa kiba la mynsaw. U la pynbna ruh ba ka sorkar kan ai T. 4 lak sha ki bahaïing hasem jong kitei arngut kiba la khlad.
Ka sorkar Nagaland kan sa ïakren bad ka Sorkar Pdeng bad ka NHIDCL ban shim kyrkieh ïa ki lad ki lynti na ka bynta ban ïada ïa ki nongleit nongwan ha ki jaka kiba don jingma ha ka surokbah, la ong u Rio.
