Shillong, Naitung 05:
Uwei u nongshong shnong ka Assam u la khlad na ka jingshah bom ha u paidbhur ha West Garo Hills, Meghalaya hadien ba la suba ba u dei u nongtuh masi.
Kane ka la jia ha ka shnong Baklagre kaba hap ha Selsella ha ka miet jong ka Lah Sngi U Blei.
Ka tyllong khubor na ki pulit ka ïathuh ba utei u briew uba la khlad u dei ba tip kyrteng kum u Aynal Hoque bad u dei na ka shnong Purandiara kaba hap ha Mankachar, Assam.
La ong ba u Aynal u la shah bom shah tied ha u paidbhur ha Baklagre katba u dang pyrshang ban phet krad ryngkat bad artylli ki masi.
Hynrei katba u dang pyrshang ban phet, u paidbhur u la ïoh bat ïa u bad u la bom la tied. Ynda ki pulit ki la wan poi ha katei ka jaka, la shem ba u la khlad noh namar ka jingmynsaw jur.
Ki pulit ki la ïathuh ba u Hoque u la ju shah kem teng mynshwa bad ki don ruh bun tylli ki jingujor pyrshah ïa u ha thanat Tura.
