Shillong, Naitung 05:
Ka Myntri ka tnat ka koit ka khiah, Kong Ampareen Lyngdoh ka la pynpaw ba ma ka ruh ka sah lyngngoh halor ka jingbret sha jaka theh ñiut ïa ki dawai kiba la kut ka por ban pyndonkam bad bthah ban don ka jingtohkit haba ïadei bad kane.
Ka Myntri ka la ong ruh ba kane ka dei ka jingleh bakla kaba ym dei shu ban jia biang ha ki por ban sa wan, namarba ka la ong ba kam dei ka sien banyngkong ba kum kane ka jingleh ka la jia ha kaba la hap ban bret ïa ki dawai, kiba dei ban pyndonkam ha ka por ba dang biang.
Haba jubab ïa ka jingkylli, ka Kong Ampareen ka la ong ba ynda la ïoh ïa ka kaiphod halor ka jingtohkit, kan sa ai jingtip sha ki paidbah haba ïadei bad ki sienjam ki ban sa shim haba ïadei bad kane khnang ban lah pynbeit shisyndon.
Haba pynpaw ka jingbym tip ei ei ïa ka jingshim rai ban bret noh ïa kine ki dawai, kane ka Myntri ka la ong ba donkam ban kren da kaba shai ïa ki ophisar kiba dei jong ka tnat ba kim lah ban shu ai jingbit ban leh ïa kum kine ki kam halor ki daw bapher bapher.
“Ka jingkylli kam dei ba balei ym sam ïa kine ki dawai, hynrei ka jingkylli ka long ba, balei ym pyndonkam ïa kine ki dawai ha ka por ba dang biang,” la kren diaw kane ka Myntri ïa la ka jong ka tnat ha kaba la bret ïa ki dawai sha Marten ha Mawlai Mawïong ha ka 29 tarik Jylliew, 2023.
Dang shen, ka tnat ka koit ka khiah lyngba ka DHS (MI) ka la pynshai ba kine ki dawai kiba la leit bret ki dei kiba la kut ka por ban pyndonkam, bad ka jingbym lah ban pyndonkam ïa kine ki dawai ka dei na ka daw ka jingpang COVID-19.
La kam ruh ba kane ka jingbret ïa ki dawai ka dei kaba la ïaid katkum ka rukom ba dei ban leh ha kaba la pyntip sha ki bor ba halor namarba ka jaka pyllang dawai ruh ka la khapngiah ka jaka buh ynda la wanrah ïa ki dawai kiba dang thymmai.
Hynrei ka Kong Ampareen ka la bteng ban buh ki jingkylli, ha kaba la kylli, kumno ki briew ki ïoh rung sha ka jaka theh ñiut jong ka Municipal ha Marten? Mano ba ailad ïa ka kali ban rung? Mano ba bret ïa kine ki dawai?. “Ym sngew lah ban ngeit ba ïa ki dawai la shu kit na jaka buh (godown), bad ym don ba tip mano ba kit. Ka Municipal Board ha ka jingshisha ka dei ban dei ka bor ba la ai jingbit ban bret ïa ki dawai ba la kut ka por ban pyndonkam, bad kata ruh ka dei ban long hadien ba la ïoh jingbit na baroh ki bor ba dei khmih,” la ong ka Kong Ampareen.
Ka la ong ba ym lah ban shu leit rung sha ka jaka theh ñiut bad shu bret kat kaba phi kwah namar ki don da ki kyndon, bad haba bud ïa kine ki kyndon, lehse hap ban pynbeit ïa kane ka jingbakla kaba la leh. “Kine kim dei ki jingkylli ban shu ïakynnoh briew, bad ngim kwah ba kane kan dang jia biang,” ka bynrap.
Ka Kong Ampareen ka la ong ruh ba ïa mynta, ka dang ïoh ïa ka kaiphod ba tohkit da ka DHS bad ïa kane yn sa phah sha ki ophisar ba kin bishar, ban sngewthuh bad ban tohkit shuh shuh, bad la bthah ïa u Managing Director ka National Health Mission ban thaw ïa ka Committee halor kane ka kam.
