Shillong, Naitung 05:
U MLA barim ka Mylliem uba dei ruh u nongaibuit jong u Myntri Rangbah ka Jylla, Bah Hamlet Dohling u la ong ba ki don ki MLA kiba kyntait ban ïarap bai dawai ïa ki paidbah haba ki pang ki shitom, hynrei u buh jingkylli ka shiphew lak tyngka ba ai ka sorkar ïa uwei u MLA ha ka shi snem ki mut buh shaei.
Ïa kine ki kyntien u Bah Hamlet u la pynpaw haba ai jingkren hadien ba u la plie ïa ka ïingdorbar shnong Nongpyiur bad ka kamra klas jong ka Nongpyiur Secondary School, Mylliem Constituency kaba la long ha ka 5 tarik Naitung, 2023 ha jingïadonlang u rangbah shnong, ki nongkitkam shnong, ki khynnah skul bad nonghikai.
U Bah Hamlet u la ïathuh ha ka por ba u long kum u MLA u ju ïarap pisa ïa kiba pang ba shitom khamtam kiba thiah ha ki hospital namar ka dei ka pisa ba wan na sorkar.
U la ïathuh ba ha ka por ba u long kum u MLA u la ïoh ban kyrshan pisa ïa ki nonghikai haduh saw tylli ki skul kynthup ïa ar ngut ki nonghikai kiba hikai ha Nongpyiur Secondary School.
Shuh shuh u la ong ïa ka tulop kaba u ïoh um ju ïoh ban pyndonkam ïalade namar u ju pynlang ban sam khusnam ïa ki samla pule kiba pass bha naduh SSLC bad HSSLC da kaba ai pisa mar T.3000 bad ka laptop ïa kiba wan Top-20 ha SSLC.
“Nga sngewthuh kam myntoi ban kamai spah hangne ha pyrthei namar ynda nga la shah khot sha kawei ka pyrthei, ngam lah ban rah tang shi tyngka, namar kata katba nga don ka por ngan trei shitom ban shakri ïa ki paidbah” u la ong.
U la pynkynmaw haba u dang long kum u MLA haba ki paidbah ki wan pan bai dawai, bai kot skul, bai thiah pang ha hospital, bai dawai sboh u ju ai beit namar kam dei ba u sei na pla lajong hynrei u ïoh ka jingïarap shiphew lak ha ka shi snem na ka sorkar ban ïarap ïa ki paidbah.
Kumta u la kyntu ïa ki paidbah ba ki dei ban tip ïa kane ka jingïoh u MLA namar ha kine ki sngi ki don ki MLA ki la kyntait lypa ban ai bai dawai, bai kot skul ïa ki paidbah.
Ha kajuh ka por u la ong haba la long MLA hap don ka jingkitkhlieh kum u kpa ïa ka ïing ka sem.
Ïa kane ka ïingdorbar bad kamra klas jong ka Nongpyiur Secondary School la shna ha ka jinglut na ka MLA skhim ha ka por ba u Bah Hamlet u dang long kum u MLA.
