Shillong, Naitung 05:
Ka Khasi Hills Autonomous District Council (KHADC) ka la ïeng skhem ban pyrshah ïa ka Uniform Civil Code (UCC) ha ryngkat ki seng bapher bapher da kaba kdew shai ruh ba ki kyndon ka Sixth Schedule kiba kren shaphang ka jingsynshar ïa ki jaka riewlum ha kaba ka Sorkar Pdeng ruh kam don hok ban leh donbor ban pynduh pyndam ïa ki riti dustur jong ki jaitbynriew ’riewlum.
Ïa kane la pynpaw ha ka jingïalang jong ka Executive Committee ka KHADC kaba la lum da u Chief Executive Member (CEM) Bah Pynïaid Sing Syiem lem bad kiwei ki EM ha ryngkat kiwei pat ki seng bad khlieh nongsynshar, ha kaba la rai da kawei ka sur ban pyrshah jur ïa ka jingthmu ka Sorkar Pdeng ban pyntreikam ïa ka UCC.
Ha kane ka jingïalang, kiwei pat ki seng kiba la poi lang ki kynthup ïa ka KSU, FKJGP, HNYF, HYC, bad ka Synjuk Ki Nongsynshar Shnong Ka Bri U Hynñiewtrep (SNSBH) kiba la pyrshah jur ïa ka jingthmu ka Sorkar Pdeng ban pyntreikam ïa ka UCC ha ka ri namar ki ong ba ki ’riewlum kiba don la ki riti dustur tynrai, kin sa shah ktah ha ka UCC bad wat ki District Council ruh kin shah pynduh bor noh.
Nalor ka jingai jingmut ban pynsngew kawei ka sur sha ka National Law Commission, ka la don ruh ka jingai jingmut ïa ki District Council ka jylla ban ryntih kawei ban pyrshah ïa ka UCC. La pynsngew ruh ba donkam ban lum ïa ka jingïalang jong baroh 10 tylli ki District Council kiba don ha ka thaiñ Shatei Lam Mihngi ban shimlang ïa ka rai ban pyrshah jur ïa ka UCC.
Haba kren sha ki lad pathai khubor, u Deputy CEM ka KHADC Bah PN Syiem haba batai ïa ka rai ban pyrshah jur ban pyntreikam ïa ka UCC, u la ong ba kane ka aiñ kan ktah jur ïa ki riti ki dustur tynrai, ka khyndew ka shyiap, ka jinglong kyrpang ka jaitbynriew bad ïa ki niam bapher bapher bad kan pynduh bor ruh ïa ki District Council.
Haba batai ïa ka rai, u la ong ba ïa ki jingpynsngew bad jingai jingmut, yn sa bsut lang ha ka jingthoh kaba ka KHADC kan sa phah sha ka National Law Commission shwa ka 14 tarik u Naitung ban pyrshah ïa ka UCC.
Ka Sorkar Pdeng lyngba ka Ministry of Law and Justice ka pan ïa ki jingai jingmut halor ka UCC haduh ka 14 tarik Naitung, 2023.
Ka jingthoh kan bynrap lang ruh bad ka rai (resolution) kaba la dep mynjur da ka Ïingdorbar KHADC ha ka 24 tarik Jylliew ban pynkhlaiñ ïa ka jingpyrshah ïa ka UCC.
U Bah PN Syiem u la batai ruh shaphang ki kyndon hapoh ka Article 244 jong ka riti synshar ka ri kiba kren shai ba ka jingpynïaid bad jingkhmih ïa ki jaka jong ki ’riewlum ka dei ban long katkum ki kyndon aiñ ka Sixth Schedule jong ka riti synshar ka ri.
Haba pynkynmaw ba bun tylli ki Sorkar Pdeng kim shym la ktah ïa kane ka aiñ, u Bah PN Syiem u la ong ruh wat ha ka por ba synshar ki phareng, kim shym la nud ban pynduh jait ne pyntlot bor ïa ka riti dustur bad jinglong tynrai jong ki Khasi.
Nalor kane, u la ong ba ka KHADC kan sa lum ruh ïa ka jingïalang bad kiwei pat ki Autonomous District Council kiba don hapoh ka jylla ban ïakren ïa kane ka mat.
