Shillong, Naitung 05:
U Secretary ka Khasi Jaiñtia Christian Leaders Forum (KJCLF), Rev. Dr. Edwin H. Kharkongor ha ka Sngi Balang u la ong ba ka Uniform Civil Code (UCC) kan ym long satia ka atiar ka ban wanrah ïa ka jingïatylli hapoh ka ri.
“Ha kaba nyngkong eh, ngam shai ka UCC ka dei kaei bad kaei ka jingthmu jong ka. Katkum ki jingbatai paidbah, la ong ba ka UCC kan wanrah ïa ka jingïaryngkat bad jingryntih ha ka jinglong jingim haba phai sha ki riti-dustur, shongkha-shongman, ka jingïoh pateng, ka jinglong-jingman ha ka imlang-sahlang bad kiwei-kiwei. Ngim tip pat haduh katno kan ktah ïa ka jingngeit,” la ong u Rev. Kharkongor.
Ha kajuh ka por, u la ong ba lada jia ba pyntreikam ïa ka UCC, ka rukom long jong ka jaidbynriew, kaba ju shim jait na ka kmie ruh ka lah ban duh noh.
“Ka UCC kam pat long kaba shai namar ngim pat ïohi wat tang ïa ka saiñdur jong ka ne kiei kiba la thoh ha ka,” u la ong.
Ha kawei ka liang, u la ïathuh ba katkum ka jingsngewthuh jong u, ka UCC ka la mih na ka Article 44 jong ka Riti Synshar ka Ri ha kaba la kdew ba ka Jylla ka lah ban don ïa ki aiñ ban wanrah ïa ka jingïaryngkat ha ka imlang-sahlang, hynrei ym shym la batai bniah ha kano ka rukom ban pyntreikam ïa ka.
“Ha nga shimet, lada ka UCC ka dei ban pynurlong ïa ka jingong u Modi – kawei ka jaidbynriew, kawei ka ktien, bad kawei ka niam hapoh ka ri, kata kan sa mih ka huri-hura, ka ïapait-ïapra hapdeng ki jaidbynriew bapher-bapher. Kumta nga kwah ban buh jingkylli…hato ka UCC kan pynurlong ïa ka jingkwah u Modi?” la buh jingkylli u Rev. Kharkongor.
Haba phai sha ka shongkha-shongman, u la ong ba lada ka UCC ka don jingthmu ban pynïaryngkat ne pynryntih ïa kane ka bynta, kan ym long kaba suk namar ka ri ka don ïa ki jaidbynriew bapher-bapher kiba bud bad don ha ki jingngeit niam bapher-bapher bad kumta kin ym pdiang lada long lang kumjuh salonsar.
“Ha ka liang ka jingïoh pateng ruh kan wanrah jingeh khamtam ïa ka jaidbynriew jong ngi. Kan ym ïahap satia bad kiwei pat ki jaidbynriew,” u la ong da kaba bynrap, “Wat lada kam paw ba kan ktah ïa ka jingngeit jong ki briew shimet lane ka jingbud jong ki ïa kano-kano ka niam ba ki sngewbit – hato ka UCC ka lah ban wanrah kawei ka rukom jingngeit kaba ryntih bad ïa ryngkat hapdeng ki jingngeit niam bapher-bapher.”
Haba ban biang ba kat bym pat ïohi ïa ka saiñdur, u la ong ba ym lah ban ai jingshai ne jingkynthoh halor katei ka bynta.
“Kaba ngi sngewthuh na ki jingïatip-jingïasngewthuh paidbah ka long ba ka UCC kan wanrah bun ki jingeh hapdeng ki jaidbynriew, jingngeit bad rukom im ha ka liang ki riti-dustur bad kan ym long satia ka atiar ka ban wanrah ka jingïatylli hapoh ka ri,” la ong utei u nongïalam ka KJCLF.
Na ka liang jong u, u la pynsngew ba lada jia ba ka UCC ka pyrshang pynban ban wanrah ïa ka jingryntih ha ka ïoh ka kot, jingdon-jingem; kata uba riewspah u nym riewspah than bad uba duk um dei ban duk tasam, kata ka long kaba sngew dei ban pyrshang bud bad pyntreikam ïa ka.
Shuh shuh u la bynrap, “Lada ka UCC ka pynduh-pyndam ïa ka jingsngewpher jaidbynriew, kata kan wanrah ïa ka jingbha.”
