Tura, Naitung 05:
Ka Niksamso Garo Community Organization (NGCO) ka la ujor pyrshah ïa 2 tylli ki Self Help Group (SHG) na Ri-lum Garo halor ka jingkynnoh sei tuh ïa ka pisa kaba dei na bynta ban pyndep ïa ki projek hapoh ka Chief Minister’s Special Development Fund (CMSDF), kaba ha ka jingshisha khlem shym la pyntrei eiei ha madan.
Ka jingujor pyrshah ïa kitei ki 2 tylli ki SHG – Akusa Self Help Group na Walbakgre, Tura bad ka Chinasa Self Help Group na Kebolpara, Ampati, la ujor ha ka Sngi Balang ha u Deputy Commissioner ka South West Garo Hills.
Katkum katei ka jingujor, T.9,98,900/- na bynta ka jingshna ïa ka surok (jeep-able road) ha ka shnong Durapara bad T.9,99,000/- na bynta ka jingshna sa ïa kawei ka surok (CC jeep-able road) ha ka shnong Bakdagre la sei da u Secretary ka Akusa Self Help Group.
Ha kajuh ka por, T.9,99,300/- na bynta ka jingshna ïa ka surok (CC jeep-able road) ha ka shnong Debajani, T.9,99,300/- haba ïadei bad ka surok (CC jeep-able road) ha Sanjengpara bad T.9,99,600/- na bynta ka jingshna ïa ka surok (CC jeep-able road) ha Aruakgre la sei da u Secretary ka Chinasa Self Help Group.
Kaba sngewlyngngoh ka long ba watla baroh ki projek kiba la dep kyntiew ha ka thup ha ka jingthoh ki kdew ba ki dei kiba la dep pyntrei, hynrei ym shym la don kawei ruh kaba la sakhi ha madan. Baroh kitei ki projek kiba la mutdur ba ki dei kiba la dep pyntrei ki hap hapoh Zikzak C&RD Block, South West Garo Hills.
Ha kawei ka liang, haba kdew ba kitei ki 2 tylli ki SHG ki la dep ban sei tuh T.49,96,100/-, ka NGCO haba pynrem ïa katei ka jingjia ka la dawa ban thaw da ka ‘Inquiry Commission’ ban tohkit ïa katei ka kam khnang ba lah ban pynshitom pyrshah ïa ki.
