Shillong, Naitung 05:
Hadien ba u Myntri ka tnad Social Welfare ka sorkar jylla, u Bah Paul Lyngdoh u la pynbna paidbah ba ka shnong Pynursla ka dei kawei na ki jaka kaba kynrei bha u drok, na ka liang ki nongïalam shnong kiba don hapoh ka shatri jong ka Federation of Riwar Mihngi Local Dorbar ki la pynpaw ïa ka jinglyngngoh bad ka jingsngew kyndit kaba khraw bad ka la pynlong ruh ïa katei ka kynhun ban leit pan jingpynshai na utei u Myntri halor katei ka jingpynbna ka jong u.
Haba kren sha ki lad pathai khubor ha ka sngi balang hadien ka jingwan kynduh ïa utei u Myntri, u Bah Edmund Khongngai u la ong ba na ka liang ki kynhun nongïalam jong ki shnong bad ki raid bapher bapher jong ka thaiñ Ri War Pynursla baroh kawei da ka jingsngewkhia bad ka jinsngew kitkhlieh ïa la ka jong ka thaiñ ka dong Ri War, ki la wan ban ïakynduh ïa u Myntri ban pan ka jingpynshai bad ban ai ka jingtip ïa ki jaka kaba na ka liang ka tnad pulit bad na ka liang jong ka sorkar ki lap ïa ka jingdon jong ki nongdih drok bad ki nongkhaïi hapoh ka thaiñ Ri War.
U Bah Khongngai u la ïathuh ba hadien ka jingïakynduh ïa utei u Myntri, utei u Myntri u la ïathuh ba ka la ju don teng ka jingjia ha u bnai Risaw ha u snem 2022 ha kaba la ïoh kem ïa ki nongkhaïi lane ki nongdih drok hapoh ka thaiñ Pynursla.
“Na ka liang jong ngi ka Federation of Ri War Mihngi Local Dorbar, ngi wan da ka mynsiem sngewkhia, bad ngi la ai ruh ka jingmut ha u Myntri ka tnad Social Welfare, u Bah Paul Lyngdoh ha kaba ïadei bad ki saw tylli ki mat na ka bynta ban aibor noh ïa ki shnong bad ïa ki seng samla, ki seng longkmie ban peitngor lang ha kaba ïadei bad ka suk ka saiñ”, la ong u Bah Khongngai.
Katei ka kynhun ka la ai jingmut ruh ïa utei u Myntri ba dei ban aibor ban thaw noh da ka Village Task Force Community ryngkat bad ka jingïatreilang jong u BDO bad ka tnad pulit.
