Shillong, Naitung 05:
Ka Meghalaya High Court ha ka Sngi Balang ka la bthah ïa ka sorkar bad ïa ka Jowai Municipal Board ba na ka daw ka lehniam Behdeiñkhlam, dei ban pynthikna ba ki jaboh jabaiñ bad ki ñiut ki ñier kim dei ban lang ha surok bad ki lynti syngkien ha sor Jowai.
Haba bishar ïa ka mukotduma ba la ai da Synjuk Ki Waheh Shnong Jowai pyrshah ïa ka sorkar bad kiwei, ka High Court ka la ong ba ki la don ki jingthoh na ka liang ka Synjuk bad ka Municipal Board kiba la pynpaw ba ki la don ki lad kiba la buh na ka bynta ka jinglum ïa ki ñiut ki ñier na sor Jowai.
“Kyrmen ba la pynbeit ïa ki jingeh ki nongshong shnong na ka daw ka jingbym wan ki trok kit ñiut sha ki dong,” la ong ka High Court.
Nalorkata, ka High Court ka la ong ba namar ka jinglehniam Behdeiñkhlam ka ban long mynta ka taïew, ka sorkar bad ka Municipal Board ki dei ban kham trei borbah ban pynkhuid ïa ka sor Jowai bad lah ruh ban pyndonkam kham bun ki trok khnang ba kin lah ban kit ïa ka ñiut ka ñier bad kan ym lang ha surok lane ha ki ïing briew.
