Shillong, Naitung 05:
Ka Meghalaya High Court ha ka Sngi Balang ka la thalaiñ ïa ka sorkar jylla ha kaba ïadei bad ka jingduna bording bad ka la ong ba kam lah satia ban pdiang ba ka jingduna bording kan long palat ïa ka 50 na ka 100 (50 per cent).
Katei ka jingkynthoh na ka High Court ka la wan ha ka por ba ka la shong bishar ïa ka mukotduma ba la ai da u Flaming B. Marak pyrshah ïa ka sorkar bad kiwei halor ka jingkyrduh bording ha jylla.
Khyndiat bnai mynshwa ha ka por bym pat wan u slap lyiur, ka sorkar ka la pynpaw ba namar ka jingduna slap, ka um ha Umïam ka la hiar bad namarkata, ka la jynjar ban tan bording ha ka rukom kaba dei.
Nalorkata, ka sorkar ka la pynpaw ba da ka jingsdang wan u slap lyiur bad ka um ha Umïam ka la kiew, yn sa lah ban teh lakam ïa ka jingkyrduh bording.
Shuh shuh ha ka jingthoh ba ka ai kham mynshwa sha ka High Court, ka sorkar la ka kdew ba watla ka jingdawa bording ha jylla ka long kumba 200 Mega Unit ha ka shi sngi, ka jinglah ban pynbiang bording pat ka long tang 88 Mega Unit ha ka shi sngi.
Ha ka kaiphod jong ka sorkar ba la ai mynta ka sngi, la pyni ïa ki shlem kiba kongsan kiba la shah pyllait na ka jingpynlip bording, hynrei ym shym la batai pat katno ka jingdawa bad jinglah pynbiang bording ka long ïa mynta. Ha kajuh ka por, ka sorkar ka khlem batai bniah ki sienjam kiba ka la shim ban pynkhlaiñ ïa ka jingsam bording.
“Ka long ka bym lah ban pdiang ba ka jingduna bording kan tam ïa ka 50 per cent. Ka lah ban long ba na ka daw jong ka jingduna slap bad kiwei ki jingdkoh, ka jingsam bording ka lah ban hiar ym palat ïa ka 10 per cent na ka jingdawa kaba man la ka sngi,” la ong ka High Court.
Ha kajuh ka por, ka la ong ba ka paw ba ka jingduna hangne ka long palat 50-60 per cent na ka jingdawa kaba man la ka sngi, bad ïa kaba kum kane, yn ym lah satia ban pdiang da lei-lei ha ka por ba ki kam khaïi-pateng bad ka jingim briew ba man la ka sngi ka shah ktah jur na ka jingbym don bording.
Namarkata, ka sorkar ka la shah bthah ba ka dei ban ai biang da ka kaiphod kaba bniah bad ban pyni katno ka jingdonkam bording ha man ki distrik bad katno na kata ka jingdonkam, ka sorkar ka lah ban pynbiang. Ka sorkar kan hap ruh ban pynpaw ïa ki sienjam ba ka la shim ban pan bording shuh na ka National Grid bad kiwei pat ki tyllong kiba don khnang ban pynrit ïa katei ka jingduna ha ka jingsam bording.
Ha kawei pat ka liang, ka High Court ka la bthah ïa ka sorkar ba kan peit ïa ki lad ban shna ïa ki Hydel Project kiba rit lane kiwei pat ki projek pynmih bording khamtam ba ka jylla ka ïoh bha ïa u slap.
Ha ka jingshisha, ka High Court ka la ong ba dei ban don ka saiñdur kaba na ka bynta 10 lane 20 snem da kaba shim jingkheiñ ïa ka jingdonkam bording ha ki snem ki ban wan khnang ban pynthikna ba yn lah ban pynmih bording lane ban thied ne ban shim na kiwei pat ki tyllong ba kan ym don ka jingduna ha ka jingdonkam bad ka jinglah ban sam bording.
