Khliehriat, Naitung 05:
Ka Dorbar Shnong Moolamylliang ka la pyrshah jur ïa ka jingleh jong ka Jaiñtia Hills Autonomous District Council (JHADC) bad katto-katne ngut ki briew ban ithuh ïa ka Umpleng kum ka shnong bathymmai watla ka dang hap hapoh u pud u sam jong ka shnong Moolamylliang, East Jaiñtia Hills District.
“Naduh mynshwa ïa ki kot ba donkam kum ka ‘Residential Certificate’, ‘No Objection Certificate’ bad kiwei-kiwei ki kot donkam ban ai sha ka Sorkar bad sha kiwei-kiwei ki kam, la ai beit da ka shnong Moolamylliang na bynta ka bha ka miat jong ki paidbah ka thaiñ,” la ong u Waheh Shnong Moolamylliang, Bah Apmon Pachiang.
Nalor kata, u la ong ba naduh mynshwa ka Umpleng ka don hapoh ka jingpeit jong ka shnong Moolamylliang la ka long ha ki kam kiba ïadei bad ka ophis u Deputy Commissioner lane ki kam kiba ïadei bad ki pulit.
U la ong ba haduh mynta ym pat don briew ba shong shnong ha Umpleng lait noh tang katto-katne tylli ki dukan.
U Bah Pachiang u la ong ba kane ka jingleh jong ka JHADC ka long pyrshah ïa ka aiñ jong ka Council ha kaba ka kyndon 20 (i) Ka aiñ Jaiñtia Hills Autonomous District Council (Establishment of Elaka, and Village, Appointment, Powers, Function and Jurisdiction of Dolloi/Sirdar, Waheh Shnong) Act, 2015, ka kren shai – ban thaw ïa ka shnong kaba pura dei ban don 20 tylli ki longïing bad ym duna 50 ngut ki briew ban shong shnong.
Ka Dorbar Shnong Moolamylliang ka la ai da ka jingthoh ha u Chief Executive Member ka Jaiñtia Hills Autonomous District Council, Jowai ban peit ïa kane ka kam bad ban leh ïa kaba donkam katkum ki aiñ ki kyndon jong ka Council.
