Jowai, Naitung 05:
Ka Seiñ Kur Sutnga 14 Khrong, Jowai ka la pynshai paidbah ba u Bah Jimmy Sutnga uba shah kem ha kine ki khyndiat sngi ha ki pulit jong ka West Jaiñtia Hills District halor ka jingdonkti ban khaïi drok um dei na ka Kur Sutnga.
Ka Seiñ Kur Sutnga 14 Khrong ha u kyrwoh ba la phah da u General Secretary ka Seiñ Kur Sutnga 14 Khrong, Jowai, ka la ong hadien ba la mih ha ki kot khubor ïa ka jingshah kem u Bah Jimmy Sutnga ba shong ba sah ha Jowai, ki dkhot jong ka Seiñ Kur ki la leit ïakynduh ïa ki bahaïing hasem jong u Vag Jimmy ban wad ïa ka tynrai ha kaba ïadei bad ka jingkam kur jong u.
Ka kur ka la pynshai ba hadien ka jingkylli bad tohkit bniah na ki bahaïing jong u, la ïoh jingtip ba u Jimmy um dei na ka Kur Sutnga hynrei u dei na ka Kur Pdang.
Ha kaba ïadei bad kane, ka Seiñ Kur ka la maham ïa kino-kino ki briew kiba pynthohbria ïa ka kyrteng jong ka kur da kaba kam kulmar khlem da dei shisha bad lada lap nangne shakhmat ka Seiñ Kur kan pynshitom katkum ki kyndon treikam jong ka.
