Shillong, Naitung 06:
Hadien kumba saw bnai eiei mynshuwa uwei u briew ba la tip kyrteng kum u Damut Bang u la wan pyndem ha ka Sngi Ba-ar hakhmat ki pulit ka Ummulong Beat House kaba hap ha Jowai Police Station.
U Damut Bang u dei uwei na kiba la shah kynnoh donkti ban dung ïa u Solomon Rymbai uba dei u dkhot ka Hynñiewtrep Integrated Territorial Organization (HITO).
Kumta ki pulit ki la rah noh ïa u Damut sha ïingbishar ha ka Sngi Balang bad ka ïingbishar ka la hukum ban pynngat ïa u ha Judicial Custody.
Lah ban pynkynmaw ba u Solomon Rymbai u la shah dung ha ka 9 tarik Lber, 2023 ha Mukhla Shohshrieh.
Katkum ka jingujor halor katei ka jingjia, ki la don ar ngut kiba la paw kyrteng kum kita kiba la donkti ban dung ïa u Solomon. Kine ki kynthup ïa u Damut Bang bad u Palmon Sari na ka shnong Lad Mukhla, West Jaiñtia Hills District.
