Jowai, Naitung 06:
Ki nongïalam ka KSU ha ka jingïadonlang u President samla Kitboklang Lamare, samla Rimiki War bad kiwei ki la leit ban hiar biang mynta ka miet ban leit jurip ïa ka CHC Namdong ha ka por ba lip bording ha katei ka thaiñ bad lap haduh mynta kane ka CHC ka shong hapdeng ka jingdum,
U President ka Unit Samla Kitbok Lang Lamare u la ong ba kane ka CHC ka la long kum ka sem ki mrad, namar ba ka jingpynkha khun ruh la isynei hap ban shu tbeh da ki mombati bad ki jingtbeh ding. Haba kumne kan jia aïu ïa ka jingim briew. Hato ban sumar briew ka long mo ha pdeng ka jingdum?
Ka tnad ka koit ka khiah ka la kheiñ dewthala ïa kane ka CHC ka jong ngi khlem da shim khia ïa ki jingpynsngew ka seng ha kaba ïadei ban pynbha ïa ki Panel Solar bad lane ban buh da ka Generator Machine kumba la ai jingmut da ka seng ha kine ki khyndiat taïew ba la dep.
Kumta na ka liang ka seng kam lah ban shu peit da ki khmat ïa kane ka jingeh ba kane ka CHC ka hap mad. Namarkata, lada ka tnad ba dei peit kam shim khia ngin hap ban pyrkhat da kumwei pat.
