Jowai, Naitung 06:
Ka Myntri ba dei peit ïa ka tnat ka koit ka khiah bad ka rep ka riang ka Kong Ampareen Lyngdoh ryngkat ki katto katne ngut ki MLA ka rilum Jaiñtia ki la hiar sha nongbah Jowai ban ïakynduh ïa ki ophisar jong kine ki tnat ban buddien bad phylliew jingmut halor ka koit ka khiah, ka rep ka riang bad ka rukom pynïaid ïa ki projek kiba pyntreikam hapoh ki ar tylli ki district ka West Jaiñtia Hills District bad East Jaiñtia Hills District.
Ïa ka jingïalang ne Zonal meeting kaba donlang ki MLA ka rilum Jaiñtia kynthup u MLA ka Amlarem Bah Lahkmen Rymbui, u MLA ka Jowai Bah Wailadmiki Shylla, u MLA ka Mowkaïaw Bah Nujorki Sungoh bad ka MLA Sutnga Kong Santa Mary Shylla la pynlong ha Conference ka Soil & Water Conservation office, Mihmyntdu, West Jaiñtia Hills ha ka Sngi Palei.
Ha kane ka jingïalang, ka Myntri nyngkong ka la phylliew jingmut bad ki ophisar ka tnad ka koit ka khiah bad la pynsngew ruh ïa ka halor ka jingeh jong ki nongtrei ASHA hapoh ka District.
Hadien kane ka Myntri ka la don jingïalang bad ki ophisar jong ka Agriculture, Horticulture bad Research, District & Local Research Station bad Laboratory jong ki ar District.
Ki ophisar ki la batai bad pyni ruh ïa ka rukom pyntreikam ïa ki skhim bapher kiba ïadei bad ka rep ka riang nalor kiwei ki kam ki ban pynmyntoi ïaki nongshong shnong.
Kiwei ki ophisar sorkar kiba la donlang ki long ka Kong Isawanda Laloo, IAS, Secretary Sorkar Jylla ba dei peit ïa ka tnad Agriculture bad Farmer Welfare, ki Deputy Commissioner jong ka West bad East Jaiñtia Hills District ba kynthup u B S Sohliya, IAS bad u Abhilash Baranwal, IAS bad u Superintendent of Police West Jaiñtia Hills District u Chemphang Syrti.
