Jowai, Naitung 06:
Ka Jaiñtia Students’ Union (JSU) ka la pyrshah ïa ka jingthmu ka sorkar ban wanrah ne shna lynti rel ha Jaiñtia Hills.
Kumta na ka liang ka JSU ka la kyntu ïa u Myntri Rangbah ka jylla ha ka jaka ban shna ïa ka lynti rel hynrei ban shna da ki jaka pule, ki jaka ai jingsumar bad ki surok kiba janai ha rilum Jaiñtia bad ban pyntreikam noh ïa ka Inner Line Permit (ILP) hapoh ka Jylla.
Ka JSU ka la ong ba ka sngewthuh ïa ka jingmyntoi lynti ka jingdon ki lynti rel naduh ka leit ka wan, ka ïoh ka kot, ka khaiï pateng bad kiwei ki thaiñ. Hynrei, ka Meghalaya bun ki nongshong shnong ki dei ki riewlum bad kumta donkam ïa ka sorkar ban wanrah nyngkong ïa ka ILP hapoh ka jylla khnang ban tip ïa ka leit ka wan jong ki briew kiba nabar khnang ban ïada ruh ïa ka jinglong kyrpang ki briew jong kane ka thaiñ.
Ka JSU kam pyrshah ïa ka lynti rel, hynrei donkam shwa ïa ka ILP ban ïada na ka jingwan rung be-aiñ jong ki bar jylla bad kaba donkam ka long ban kyntiew ïa ka pule puthi, ki jaka sumar, ki surok kiba paka kiba dei ki jingdonkam kiba hakhmat jong ka thaiñ.
