Shillong, Naitung 06:
U Myntri Rangbah ka Jylla, Conrad K Sangma u la ong ba kam long kaba suk ïa ki bor Sorkar ba kin lah khang pura ïa ka jingtih bad jingkhaïi be-aiñ ïa u dewïong hynrei ka jingpyrshang ka la ïaid shaid-shaid.
Haba ïakren bad ki nongthoh khubor, u Conrad u la ong ba ki la don ki aiñ bapher bapher na ka bynta ki briew kiba trei ïa ki kam be-aiñ ha ka kam tih dewïong.
“Ki bor Sorkar ki la leh ïa kaba dei ban leh bad ki la pynrung kyrteng da ki hajar tylli ki case bad da ki hajar ngut ki briew ki la shah kem bad shah chargesheet. Kat kaba lah, ngi la pyrshang ban leh eiei ha kaban pyntikna ba ngin lah pynduna ïa kane ka kam ba be-aiñ,” la ong u Conrad.
U Conrad u la ong, “Kaba ar, phi hap ruh ban sngewthuh ïa ka jingshisha halor kane ka kam, ba ki briew ki la leh ïa katei ka rukom tih dewïong naduh ki 200 snem mynshuwa bad ka kamai kajih jong ki ruh ka ïaid na kane ka kam”.
“Katba kam pat don kawei pat ka lad kamai kajih, ki briew kin dang ïai bteng ban leh ïa kine ki kam. Kam long kaba suk ïa ki bor Sorkar ban shu khang syndon ïa kiei kiei baroh hynrei ka jingpyrshang ka la don,” u la bynrap.
Hynrei u Conrad u la ong, “Ngi kmen ban ïohi ba mynta ka jingtih dewïong katkum ka aiñ kan sa sdang noh bad ngin sa ïoh ïa ka jingtih dewïong da ka jingstad saïan bad ngin sa ïoh ruh ïa kiwei ki lad kamai kajih la ka dei ha ka kam rep kam riang lane kam jngohkai bad kane ka dei ka lynti kaba ngin sa ïohi ha ka ban lah pynkut noh ïa kine ki kam be-aiñ”.
“Mynta saw ngut ki briew ki la ïoh jingbit bad katba ngi dang ïakren, ka jingpynkhreh ïa ki jingdonkam baroh ki la nang ïaid bad nga kyrmen ba hapoh kine ki khyndiat bnai ban wan, ngin sa ïohi katto katne ki par ki la sdang da ka jingtih katkum ka juk saïan,” u la bynrap.
Haba kylli halor ka drone technology, u Conrad u la ong “Ka kham kyllaiñ kane ka kam namar ka jaka ka long kaba heh bad hooid ngi don ïa ki drone hynrei ngi donkam bun tylli ki drone bad ngi la pyndonkam teng ruh ïa ki drone technology ban ‘map’ ïa ka jingpynlang ïa u dewïong la ki dei kiba beaiñ ne ki bym beaiñ bad ïa kane la dep ban aiti sha ka ïingkashari”.
U Conrad u la ong, “Kane ka dei ka kam kaba hap pynbteng bad namar kata ngin donkam ban buh haduh 100 tylli ki drone bad kiba treikam man la ka sngi ban ‘map’ ïa ki jaka. Kane ka dei ka lynti kaba ngi lah ban shong bishar bad khmih bniah hynrei kumba nga ong, ki don ruh ki bynta ba ktah ïa ka pla tyngka bad ka bor khmih namar ka jingdonkam ïa ki briew”.
