Khang dam ka Elaka Nongjngi ïa ka leit ka wan bad ki shnong Karbi

Jowai, Naitung 06:

Ka Dorbar jong ka Elaka Nongjngi ka la rai ban khang dam pura ïa ka rung ka mih na ki shnong ne sha ki shnong kiba markhap bad ki shnong Karbi haduh ban da wanphai biang ka shong suk shong shngaiñ hapdeng ki nongshong shnong Khanduli bad ki Karbi.

            Ïa kane ka rai la shim ha ka jingïalang ba la pynlong kyrkieh ha shnong Khanduli hapoh Namdong C&RD Block ha ka Sngi Palei mynta ka taïew.

            Kum ban shu pynkynmaw, ka jingïakynad hapdeng ki nongshong shnong Khanduli bad ki Karbi na ki shnong kiba marjan ka la sdang ha u Ïaïong mynta u snem hadien ka jingwan buh jubor ïa ka khyrdop lum khajna bai rung da ka Karbi Anglong Autonomous Council (KAAC) ha Khanduli.

            Na ka daw jong ka jingpyrshah jong ki nong Khanduli ïa katei khyrdop lum khajna bai rung, ki Karbi ki la pynpaw ïa ka jingbitar da kaba khang ïa ki nong Khanduli ban leit rep leit riang sha ki pynthor ki hali jong ki kiba don ha thain Karbi.

            Hadien ka jingïalang, u Dolloi jong ka Elaka Nongjngi Bah Copiousness Daw u la ong ki la ïoh ïa ka jingtip kaba tikna ba ki Karbi ki dang ïoh lad ban khaiï pateng bad katto katne ki Pnar wat hapdeng ka jingkhang dam ha thaiñ Khanduli.

            “Kumta ka Dorbar  jong ka Elaka Nongjngi ka la shim ïa ka rai ban khang dam ïa ka leit ka wan na ki shnong Pnar sha ki shnong Karbi haduh da pynbeit ïa ka jingïakynad hapdeng ki nong Khanduli bad ki Karbi,” la ong u Dolloi ka Elaka Nongjngi.

            U la ong shuh shuh ba ka dorbar ka shim ïa katei  ka rai khnang ban teh lakam ïa kano kano ka jingshim kabu kaba lah ban pynheh shu ïa kane ka jingïakynad.

            Nalor kata, u la pynpaw ba ka dorbar jong ka Elaka ruh ka pyrshah ïa ka jingwan buh khyrdop jubor da ka KAAC hapoh u pud u sam ka Elaka.