Shillong, Naitung 06:
U Myntri Rangbah ka Jylla, Conrad K Sangma u la pyntip ba ka jingwad bniah ka la ïaid mynta ban wanrah ïa ka lynti rel ha East Jaiñtia Hills District ka ban pynïasoh bad ka Khliehriat ba dei ka nongbah jong ka district.
Hynrei kumba ka long mynta, la kane ka projek kan long kaba jop ne em kan shong eh ha ka jingïakren bad ki nongïalam ka shnong bad kiwei kiwei.
Haba ïakren sha ki lad pathai khubor ha ka Sngi Palei, u Conrad u la pyntip ba ïa ka railway projek ha East Khasi Hills bad ki bynta jong ka Ri-Bhoi District la pynsangeh lut bad na ka liang jong ka sorkar ka dang don ha ka jingïakren bad ka Sorkar Pdeng halor kane ka mat.
“Ka la don ka jingïakren bad ka Sorkar India ba ka pisa ba la mang ïa kane ka projek yn sa rah noh shawei bad yn pyndonkam noh sha kiwei ki projek jong kiwei ki jaka lane ki thaiñ jong ka Jylla kiba kloi ban pdiang ïa ka lynti rel,” u la ong.
Nalor kane, u Conrad u la ong “Ka la don ka jingwad bniah ha East Jaiñtia Hills ban pynïasoh lynti rel sha Khliehriat. Hynrei kane ruh ka shong ha ka jingïakren bad ki nongïalam shnong bad ki trai nongshong shnong nalor ki kynhun bapher bapher bad ngin sa ïapeit ïa kaei kaba mih”.
U Myntri Rangbah u la ong ba ka Sorkar India kan nym shu ïai ap sah namar ka lah ruh ba kan pyndam noh ïa kane ka projek lynti rel haduh ka Shillong bad ïa ka pisa yn sa pyndonkam noh sha kiwei ki jaka kiba lah ban pynïasoh lynti rel.
