Shillong, Naitung 06:
Ka jingbym pat lah ban weng ïa ka jingpynlip ding ilektrik wat lada ka um ha ki pung kiba den ban pynmih bording ki la nang dap, ka la nang wanrah ka jingdiaw ïa ka Sorkar namar ka jinglong jingman ka bym shngaiñ namar ym shym la lah shuh ban pynmih bording ilektrik katba nang bun ki jingdawa ban pynbiang ïa ka jingdonkam bording ha kane ka Jylla.
Haba kylli halor ki lad ki lynti kiba donkam ban shim ban kham pynduna ïa ka jingpynlip bording ilektrik ha Jylla, u Myntri ka tnat bording u AT Mondal u la ong ba kumba ka long mynta, la sangeh ban thied bording ha ka dor ba rem hadien ba ka um ha ki pung kiba pynmih bording ka la kham biang hadien ka jinghap u slap ba jur.
Haba kylli kiei ki buit ki lad kiba dei ban pyndonkam ban pynduna ïa ka por pynlip bording ilektrik, u la ong ba kaba donkam ka long kumno ban ïoh kham bun ka bording bad ban pynduna ïa ka jinglut bad jingduhnong.
“Ngi la ïaleh katba lah ban ïoh bording ha kaba la thied ruh ha ka dor kaba rem kaba pynlong ïa ka Sorkar ban pynlut T. 3 klur shisngi,” la ong u Myntri ka tnat bording uba la batai ba ka Sorkar kam shym la shongthait ban thaw lad kumno ban ïoh kham bud ka bording wat na ki National Grid.
U Myntri u la ïathuh ba wat la ka um ka la kham biang ha ki pung kiba pynmih bording ilektrik, ym pat lah ban weng ïa ka jingpynlip bording ilektrik namarba ha ka por ba ka um ka la hiar palat, la hap ban shim bording na shawei.
Kumta u la ong ba ki lad ki lynti hap ban shim kumno ban pynduna ïa ka jingthied bording bad pynduna ïa ka jingduhnong.
U la kubur ruh ba ka Jylla ka la nang mih bun ki jingdawa ïa ka ilektrik namar ka jingnang roi ki nongshong shnong bad jingmih ki ïing, bad ki don ruh sa kiwei pat ki jingdonkam ïa ka bording, naduh ki karkhana, nalor ki kali ilektrik bad kiwei kiwei ki jingdonkam bad ki kam kiba ym lah ban leh khlem ka bording ilektrik.
Ka jingpyndonkam ïa ki mobile phone, kompiwtor bad kiwei kiwei ki tiar kiba hap ban pyndonkam bad treikam da ka ilektrik ka la nang pynbun shuh shuh ïa ka jingpyndonkam bording ilektrik, katba ka jinglah ban pynmih bording ka neh kumjuh.
