Mairang, Naitung:
Ha ka Sngi Ba-ar jong ka taïew, ka shlem treikam jong ka Block Development Officer Mairang C&RD Block ka la ïoh ban pynlong ïa ka prokram ban sam ïa ki ‘M- Tab’ lyngba ka skhim Chief Minister’s Digital Learning Aid Scheme sha ki 800 ngut ki khynnah pule na Mairang Block kiba dang pule ha ka klas XI jong u snem 2022-2023 ba kynthup ruh ïa ki 7 tylli ki skul.
Katei ka jingsam ïa kitei ki ‘M-Tab’ sha ki khynnah pule ka long ruh shi bynta ban kyntiew ïa ka pule-puthi jong ki khynnah skul lyngba ka jingpyndonkam ïa ki bor teknoloji khamtam ha kane ka juk kaba mynta.
La pynlong ïa katei ka prokram ha St. Thomas Higher Secondary School, Mairang, ha kaba u Bah Metbah Lyngdoh uba dei u Chairman jong ka Meghalaya State Planning Board bad ruh u MLA ka Mairang u la long kum u Kongsan ha ka jingdonlang ruh u Deputy Commissioner ka Eastern West Khasi Hills District, u Bah G. Kharmawphlang kum u Symbud Kongsan.
Ha katei ka sngi nalor ka jingsam ïa ki ‘Tablet’ la ïoh ruh ban sam ïa ki khusnam sha ki nongjop ha ka jingïakob dro bad jingïakob thoh poitri ïa kiba la pynlong kum shi bynta jong ka jingrakhe ïa ka sngi pynneh mariang mynta u snem .
U Bah Metbah kum u kongsan haba kren ha katei ka sngi u la ong ba kane ka jingsam ïa kine ki ‘tablet’ ka long ka kabu kaba khraw ïa ki khynnah pule ba kin ïoh pdiang ïa kiba kum kine ki lad jingïarap kiba ka Sorkar ka ai khlem kano-kano ka jingsiew pisa.
Kumta u la kyntu ruh ïa ki samla pule ba kum ha kane ka juk kaba kyrduh kam kyrduh jam, kim dei ban khmih lynti tang ïa ka kam Sorkar hynrei ban thaw lad thaw lynti ha kiwei pat ki rukom kamai jakpoh.
