Shillong, Naitung 06:
U Chief Executive Member ka Khasi Hills Autonomous District Council (KHADC), Bah Pynïaid Sing Syiem u la pyntip ba na ka liang jong ka Executive Committee ka la pynkhreh ïa ka mang pisa ne ka ‘Scholarship’ ban ai sha ki khynnah pule lane sha ki nongwad bniah ba kin wad bniah halor ka jinglong jingman ka Jaitbynriew Khasi khamtam ha ka jingriewspah jong ka Jaitbynriew ha kaba ïadei bad ka riti ka dustur.
Haba kren sha ki lad pathai khubor ha ka Sngi Palei, u Bah Pynïaid u la pyntip ba ka phang jingwad bniah kan long halor ka synshar ka khadar, ka riti ka dustur ha ka liang ka kheiñ kur kheiñ kha, ka khyndew ka shyiap jong ki Khasi bad kiwei kiwei pat.
“Na ka liang jong ka EC kan ai ‘Scholarship’ ïa ki khynnah pule lane ïa ki nongwad bniah ki ban wan shakhmat bad ïa kane ngin sa aiti ha u EM uba dei khmih ïa ka pule ka puthi ba un sa leh bad pyndep ïa kaba donkam mynta u bnai”, la ong u Bah Pynïaid.
Shuh shuh u Bah Pynïaid u la ong ba ka jingthmu jong ka Council ïa ka ban khot ïa ki nongwad bniah bad ïa ki samla pule ban ai ïa kane ka mang pisa kum ka bai pule ïa ki, ka long halor ba kin wad bniah ha kaba ïadei bad ka jinglong jingman jong ka Jaitbynriew khamtam ha ka jingriewspah jong ka Jaitbynriew ha kaba ïadei bad ka riti ka dustur.
“Ngi don ïa ka riti ka dustur ka synshar khadar, ngi don ïa ki it ki hima kaba u Syiem u kmie u long u nongpeit, nongkhmih bad u nongsynshar bad ka don ruh ka bishar, ngi don ruh ïa ki raid ba u Sordar bad ki bakhraw ki peit, ngi don ruh ïa ki shnong bad ïa ki Rangbah Shnong kiba synshar ha ka shnong ka thaw na ka bynta ka jingbha jingmiat jong ka shnong”, la ong u Bah Pynïaid.
U Bah Pynïaid u la ong ba ynda ki nongwad bniah ki la dep thoh ïa ka kot wad bniah ka jong ki, ka Council kan sa lah ban pyndonkam ïa kitei ki kot ha kaba yn pyntreikam ïa ki kyndon aiñ bapher bapher hapoh ka Council bad u la ong ba hadien ba la dep ban ïakren sani bha halor kane ka kam, na ka liang ka Council kan sa pynbna shen ha kaba ïadei bad kane khnang ba lada don napdeng kino kino ki samla ne ki nongwad bniah kiba kwah ban ïashimbynta kin lah ban wan shakhmat.
“Ngi don ïa ka jaka buh kot hangne hapoh ka Council bad ynda la dep kine ki nongwad bniah ba ngi phah ïa ki ban wad jingtip ha kaba ïadei bad kano kano ka bynta ba ngin phah, lehse kan long ka spah bah na ka bynta jong ngi ba ngin don ïa ka jingtip hangne hapoh Council”, la ong u Bah Pynïaid.
Na ka liang u Bah Pynïaid u la ïathuh ruh ba na ka liang jong u Myntri Rangbah ka jylla, Conrad K Sangma u la pynpaw ïa ka jingkmen ban ïatreilang bad ka District Council halor kane bad u la ong ruh ba u u Myntri Rangbah u la pynpaw ba na ka liang jong ka sorkar jylla kan ai ïa ka bhah kaba kyrpang ha kaba ïadei bad kane.
