Jowai, Naitung:
Ka shnong Mihmyntdu ba la ñiew kum kawei na ki shnong kaba dang duna ha ka jingdon kiba nang ba stad, hynrei ka khubor kaba sngewtynnad, ka Dorbar Shnong Mihmyntdu ka la mih shakhmat ban pynkup burom ïa ki khynnah skul bad samla pule kiba ‘pass’ bha ha ka Sngi Ba-ar ha Hall ka Riatsaliya, Mihmyntdu.
Ka shnong Mihmyntdu ka dei ka shnong kaba bun bha ki nongshong shnong kiba im jakpoh da kaba bylla sngi hynrei ki kmie ki kpa jong ki khynnah ki trei shitom ban pynlut pynsep ban phah skul ïa ki khun ki kti jong ki ban ïa beh ban pynïoh jingnang jingstad ïa ki khun ki kti.
Ka shnong Mihmyntdu ka don ka jingbun briew kaba la kynjoh sha ka 10,000 ngut ki nongshong shnong. Ka don 1707 ki ïing, 16 tylli ki skul bad 7 tylli ki skul ha ka kyrdan Secondary.
Kane ka jingpynkup burom kan long ka sien kaba nyngkong ba kan ithuh ïa ka jingjop ki samla bad khynnah pule bad ban ai mynsiem ïa ki ban nang trei shitom ha ka pule ka puthi.
Ar ngut ki samla ki la ïoh ïa ka khusnam da ka ‘Laptop’ bad kine ki kynthup ïa ka Mayanka Pde kaba pule ha Jowai Govt. Public School kaba ïoh 95% na ka eksam ICSE (10th Exam) bad ka Delightful Lyngdoh kaba la ïoh 90.71% ha ka HSSLC na ka Telangana State Board of Intermediate Education.
Kine ki khynnah kiba shah pynkup burom ki don haduh 35 kiba ‘pass’ bha bad wan ha ka kyrdan ‘First Division’ ha ka SSLC bad ka HSSLC kaba kynthup ïa ka ‘Science’, ‘Commerce’ bad ka ‘Arts’.
Na kine ki 35 ngut ka Dorbar Shnong Mihmyntdu ka la pynkup burom ïa u Khadwiwed Chyrmang uba la pyndep jingpule PhD bad ïoh pdiang kyrdan Doctorate na ka Annamalai University.
U Waladmiki Shylla, nongthaw aiñ ka Jowai u la long kum u kongsan ha ka jingïadonlang u Richard B. Uriah, Principal ka North Liberty Higher Secondary School kum u Symbud Kongsan ha ka jingdonlang ruh u Waheh Shnong Mihmyntdu, u Abul Phawa, u Nominated MDC, Octomewot Lamin.
U Wailadmiki Shylla haba kren u la ong ki kmie ki kpa ki don ka bynta kaba kongsan bad dei ma ki ki ban peit thuh ïa ka sap ki khun ki kti bad ban pynshlur ïa ki ban leh ïa kaei kaba ki kwah bad angnud ban jop ha ka jingim.
U la ai nuksa ïalade ba u kwah ban pule da ka laiñ ‘Civil Service’ hynrei ki kmie ki kpa jong u ki pynshlur ban pule doktor bad kane kam poi shaei-shaei bad kum ha kane ka juk jong ka jingstad ki kmie ki kpa ki dei ban nang ban peit thuh ïa ka sap ki khun ki kti khnang ba ka lawei jong ki kan ym sepei.
Kumta u la kyntu ruh ïa ki khynnah bad samla ban bate bha ïa ka por pule khnang ba ka jingpule bad ban lehkai ne pynbyrngi bad ban jied ïa kaei ka laiñ pule shuwa ka matrik ban suk ka jingim pule-puthi
La pynphuh pynphieh shuh ïa kane ka jingsam khusnam da ka jingrwai bad shad ba la shim bynta da ki samla ka shnong Mihmyntdu.
