Shillong, Naitung 06:
Ka jyrsieh bad ka jaboh ha kaba ïadei bad ki kam dewïong ka la nang paw pyrthei hadien ba u nongmudui ïa ka mukotduma pyrshah ïa ka sorkar bad kiwei pat halor ka jingtreikam be-aiñ ki karkhana thang dewïong u la pyntip sha ka Meghalaya High Court ba u la shah byrngem ha u kpa jong uwei u briew uba la shah kem ha ki pulit halor ka jingdonkti ha ka jingpynïaid ïa kawei ka karkhana thang dewïong be-aiñ.
U Shailendra Kumar Sharma, uba dei u nongmudui ïa ka mukotduma, u la pyntip lyngba ka jingthoh ba uwei u briew uba la tip kyrteng kum u Balwant Bhama, uba long uwei na kiba shah kynnoh donkti ha ka jingpynïaid be-aiñ ïa ki karkhana thang dewïong (Coke Factor) ha Meghalaya, u la wan byrngem byrsit ïa u lada u ïai bteng bad kane ka mukotduma.
Ha ka 5 tarik Naitung, 2023, u Sharma u la leit ai da ka jingthoh sha ka High Court bad u la bynrap lang bad ka jingujor ba u la ai sha ki pulit ka thanat Basistha, Guwahati. Ha kata ka jingujor sha ki pulit, u Sharma u la pynti ba ha ka 30 tarik Jylliew, 2023, u Balwant Bhama u la ‘phone’ ïa u arsien ha ka por mynstep. Hadien kata, u Bhama u la wan dalade sha ïing sah jong u Sharma ha ka por kumba 10:30 mynstep bad u la byrngem byrsit ïa u lada u ïaid shakhmat bad katei ka mukotduma.
Nalorkata, u Sharma, ha ka jingthoh sha High Court, u la ai ïa ki kyrteng bad ki ‘phone’ nombor jong baroh ki briew kiba u la kynnoh ba ki dei kita ki ‘kingpin’ lane ki heh kiba donkti ha ka jingpynïaid be-aiñ ïa ki karkhana thang dewïong bad jingtih dewïong be-aiñ ha Meghalaya.
U Advocate-General ka jylla u la kdew ïa ka kaiphod na u Director General of Police (DGP) kaba la ai ha ka 3 tarik Naitung, 2023 bad la thoh ba ha ka jingtohkit ki pulit, ki la lap ïa uwei u briew uba kyrteng u Youdishthra Bhama, uba dei u trai jong ka M/S Kalyani Fuel Limited, Shallang, kaba long ka karkhana thang dewïong. Une u la shah kem ha ka 15 tarik Jylliew, 2023 namar u khlem ai ka jingïatreilang bad ki pulit ha kaba ïadei bad ka jingtohkit pyrshah ïa ki karkhana thang dewïong be-aiñ. Ïa mynta, une u don hapoh along.
Shuh shuh u Advocate-General u la kdew ba u Youdishthra Bhama u dei u khun jong u Balwant Bhama bad u Balwant Bhama u dei uba la shah ujor ba u la byrngem ïa u nongmudui.
“Namarkata, ka paw shai ba u nongmudui u khlem pynmih satia ïa ki kyrteng tang na lyer bad ka lah ban don ka nongrim ba u nongmudui u la pyndonkam ban sei ïa ki kyrteng jong kita kiba donkti ha ka jingtih dewïong be-aiñ bad ka jingpyndonkam ïa uta u dewïong ha ki karkhana thang dewïong be-aiñ. Donkam ban peit bniah halor kane,” la kynthoh ka High Court.
Nalorkata, ka High Court ka la kdew ba ka long kaba sngewsih ba ka sorkar bad ka tnat pulit ki la leh suki ban shim ïa ki sienjam pyrshah ïa ka jingtih dewïong be-aiñ ha jylla watla ki don ki hukum ba la ai da ka National Green Tribunal bad ba la pynskhem da ka Supreme Court.
Ha ki 15 bnai kiba la leit noh, ka High Court ka la pynmih ïa ki hukum bapher bapher ban teh lakam ïa kitei ki kam be-aiñ, hynrei kam shym la don satia kano-kano ka jingkylla, la ong ka ïingbishar.
Ka High Court ka la pynkynmaw ba dang ha ka 4 tarik Naitung, 2023, ka la ai hukum ïa ka sorkar jylla ba kan jubab ba balei ka ïingbishar kan dang hap ban shaniah ha ki bor sorkar bad khamtam ha ki pulit bad balei ym donkam ban wanrah da ka Central Bureau of Investigation (CBI) ba kan tohkit halor ki kam be-aiñ kiba ïadei bad u dewïong – naduh ka jingtih haduh ka jingpyndonkam ha ki karkhana thang dewïong be-aiñ bad haduh ka jingshalan shabar ri – khamtam ba ka paw ba ïa kine ki kam la pynïaid da ki briew kiba don ha Assam.
Ha kawei pat ka liang, na ka daw ba u nongmudui (Shailendra Kumar Sharma) u don hapdeng ka jingma bad namarba u dei uba shong ba sah ha Assam, ka High Court ka la kyrpad ïa u Director-General of Police (DGP) ka jylla Assam ba un shim ïa ki sienjam ba donkam ban pynthikna ba ki nongmudui, ki bahaïing hasem jong ki bad ki muktiar kiba mihkhmat ïa ki kin don hapdeng ka jingshngaiñ.
Ha kajuh ka por, u DGP Assam un hap ban peit ïa ka jingujor ba la ai da u Sharma sha ki pulit ha ka 30 tarik Jylliew bad ban pynthikna ba ki pulit kin shim ïa ki sienjam katkum ki kyndon aiñ.
Na ka liang u Advocate-General ka Meghalaya u la pyntip ba la dep ban ai khubor sha ki pulit ka Assam ba kin shim ïa ki sienjam ba donkam pyrshah ïa kito ki briew kiba don ha Assam bad ïa kiba la suba ba ki donkti ha ka jingtih be-aiñ ïa u dewïong bad ka jingpynïaid be-aiñ ïa ki karkhana thang dewïong ha kane ka jylla.
Shuh shuh na ka liang u Justice BP Katakey (Retired) ha ka 30 tarik Jylliew, 2023 u la dep ban aiti ïa ka kaiphod kaba 15 halor ki kam dewïong.
Ka jingbishar halor katei ka mukotduma kan long biang ha ka 13 tarik Naitung, 2023.
