Shillong, Naitung 06:
Kum kawei na ki lad ban pynmih bording ilektrik khlem da shaniah tang ha ka um kaba den ïa ki wah, ka Sorkar Jylla ka dang thaw lad mynta kumno ban lah pynmih bording na ki jaboh jabaiñ.
Ïa kane la ïathuh da u Myntri ka tnat bording, u AT Mondal ha ka Sngi Palei, haba jubab ïa ka jingkylli halor ki lad kiba ka Sorkar kan thaw kumno ban ïoh bording ilektrik namar tang na ki wah ym lah shuh ban pyndap ïa ka jingdawa bording ilektrik, khamtam haba ka shimpor ban tei ïa ki projek ba den ïa ki wah bad ka jingmih ka jingpyrshah ban den bad tei ïa ki projek bording.
U Mondal u la ong ba nalor ka sienjam ban pyntreikam ïa ka projek ban tan bording na ka sngi, ka lad kaba ka Sorkar ka dang thaw mynta ka long kumno ban lah pynmih bording na ki jaboh jabaiñ.
“Ka jingïakren ka la don bad ngi dang ïakren mynta bad ka tnat Urban Affairs (pynroi sor) ban pyndonkam ïa ki jaboh jabaiñ. Ngi dang ïakren ruh bad ka National Thermal Power Corporation (NTPC) namar ka la sdang ban pyntreikam ïa ki kor ki bor ban pynkylla ïa ki jaboh jabaiñ sha ka bording,” la ong u Mondal.
Ka NTPC ka la sdang katto katne tylli ki projek pynmih bording ha Varanasi, da kaba pynkylla ïa ki jaboh jabaiñ sha u rnga bad ban pyndonkam pat na ka bynta ban pynmih bording. Kane ka kompani ka la pyndonkam ïa ka buit da ka jingïarap lang uwei u doktor na Chennai, u Dr SK Sivakumar uba shem ïa ka buit kumno ban pyndonkam ïa ki jaboh jabaiñ kiba pynmih na ki aspatal la ka dei ki tiar ki tar kiba pyndonkam ha ki jaka sumar kiba la bret pathar sha jaka pyllang jaboh jabaiñ.
