Nongstoiñ, Naitung 06:
U Myntri ka tnat Social Welfare ka Sorkar Jylla, Bah Paul Lyngdoh u la ong ba kum ki nongkitkam kiba kham hakhmat ha ka imlang sahlang ba kin nang ym tang ban khmih ïa ka jingmyntoi ïalade hynrei kumno ban nang ruh ban ai eiei namar kaei kaba long ka dei ka jingai jong U Blei hynrei kaei pat kaba saiñdur ka dei ka jingai jong u briew ïa U Blei.
U Bah Paul Lyngdoh u la kren ïa kine ki kyntien ha ka jingïalang bad ka tnat Social Welfare, West Khasi Hills ha Vanni Hall, St. Peter’s Higher Secondary School Pyndengrei ha ka jingwan jngoh ïa ka Nongstoiñ ha ka Sngi Palei.
Nangta, u la kyntu ruh ïa ki nongtrei ka tnat Social Welfare, West Khasi Hills ba ki dei ban trei ïa ka kam ba la bynshet ha ki kum kita ki missionary ym kum ki mercenary.
Une u Myntri u la ïaroh ruh halor ka jingtrei shitom jong baroh ki nongtrei ka tnat Social Welfare kaba kynthup naduh ki ophisar haduh ki nongtrei anganwadi kiba la trei shitom na ka bynta ka bha ka miat jong ka imlang ka sahlang hapoh ka district bad ka jylla hi baroh kawei. U la kyntu ruh ïa baroh kiba la ïawan ha kane ka sngi ba ki dei ban don ka nongrim bad ka thong haba ki trei ïa kano kano ka kam ha ka jingim ka jong ki.
Halor ka jingpynrung kyrteng Aadhaar hapoh ka distrik, u Bah Paul Lyngdoh u la ai khublei ïa ki bor pynïaid distrik na ka bynta ka jingtrei shitom ban pynsngewthuh paidbah kum shi bynta ban kyntiew shuh shuh ïa ka jingpynrung kyrteng Aadhaar ha West Khasi Hills District. Nalor kane, u la kyntu ïa ki nongshong shnong ki bym pat shym la pynrung kyrteng ba kin leh kumta na ka bynta ban ïoh ïa ki jingmyntoi bapher bapher na ka Sorkar Pdeng bad ka Sorkar Jylla.
Na ka liang u Deputy Commissioner ka West Khasi Hills District, Bah Garod LSN Dykes, IAS haba kren ha ka jingïalang hakhmat u Myntri u la pynsngew dalade ïa ki jingdonkam bad ki jingduna jong ka tnat Social Welfare hapoh West Khasi Hills District bad u la kyntu ruh ïa u Myntri ba un ïarap lem na ka bynta ban nang kyntiew ïa ka rukom treikam jong kane ka tnat hapoh ka district.
U DC u la pynpaw ba ki katto katne ki mat kiba hakhmat eh kiba ka District Social Welfare Office ha WKH ka ïakynduh jingeh ba kynthup na ka bynta ki shnong ki bym pat don ïa ki Anganwadi Centre bad ki Anganwadi workers, nangta ka jingbym don jong ka Home for Children with special need, ka Rehabilitation Centre for Children with conflict of law bad kumjuh ruh ban pynkhlaiñ ïa ka District Child Protection Unit hapoh ka District.
Ha katei ka sngi nalor u Myntri bad u DC la donlang ruh u SP ka West Khasi Hills u Vikram D Marak, ka Director jong ka tnat Social Welfare ka Sorkar Jylla ka Kong CD Lyngwa, MCS, Kong VC War District Programme Officer, Nongstoiñ kaba la pynshai ruh ïa ka rukom trei kam jong ka tnat Social Welfare hapoh ka District, ki nongtrei Anganwadi ka Nongstoiñ ICDS project, ka Kong B Rynjah, Child Development Project Officer Nongstoiñ bad kiwei kiwei.
