Shillong, Naitung:
U Myntri barim ka Sorkar Jylla uba dei peit ïa ka tnad Pynroi Nongkyndong, Bah Hamlet Dohling u la ïathuh ba ka Mylliem Block kan ïoh haduh 1855 tylli ki ïing ba duk lyngba ka National Rural Employment Guarantee Scheme.
U la ïathuh ba ïa kine ki ïing baduk la dep buh kyrteng ha ka por ba long Myntri ma u ha ka Sorkar MDA-1 ha kaba ma u ryngkat bad u Myntri Rangbah Conrad K Sangma ki la leit sha Delhi ban kyrpad ïa ka sorkar India ban mang pisa shna ïing ïa ki longïing baduk.
U la pynpaw ïa ka jingsngewkmen ba kine ki ïing kiba ka sorkar jylla ka la phah sha ka Sorkar India la ïoh ka jingmynjur mynta u snem ha kane ka sorkar MDA-2.
Kumta u la ong ba ym dei mano mano ban kam trai ïa kane ka skhim ban shna ïing ba duk namar ka dei ka skhim jong ka Sorkar India kaba ïaid lyngba ka Mylliem Block na ka bynta ka jingmyntoi jong ki paidbah.
Nalor kane, u la ong ba kito ki longïing kiba dei ban ïoh ïa kane ka skhim ki dei ban pynbiang noh ïa ki kot ki sla.
Shuh shuh u la ong da ka jingïoh ïa kane ka skhim baduk kan ïarap ïa kito kiba duna ha ka ïoh ka kot ba kin ïoh ïa ka ïing ka sem kaba skhem bad kaba itynnad haba ki shong ki sah.
U Bah Hamlet u la pynpaw ïa kane haba u ai jingkren kum u kongsan mynba u plie ïa ka ïingdorbar shnong Nongpyiur, Mylliem Constituency kaba la long ha ka Sngi Balang.
