Shillong Naitung 07:
Ka Khun Hynñiewtrep National Awakening Movement (KHNAM) ka la ong ba ka jingjur u slap ha kine ki taïew ka la pyndap um ïa ka pung Umïam, bad la khmih lynti ba ka jingeh kaba ki paidbah ki ïakynduh namar ka jingpynlip bording ilektrik kan sa kut noh.
Hynrei kane ka seng ka la pynpaw ïa ka jinglyngngoh namar ka jingbteng ban pynlip bording (load shedding) haduh kine ki sngi wat lada la ïohi ba ka um ha ka pung Umïam ka la biang na ka jingjur u slap ha kine ki taïew ba la dep.
“Haduh kine ki sngi ka jinglip bording ka dang bteng bad ngi lyngngoh balei pat dang don ka jingpynlip ïa bording ilektrik ha kaba la sakhi ba wat ki jaka ai jingsumar ruh ki la shah ktah jur na ka jinglip ka bording ilektrik,” la ong ka KHNAM lyngba ka kyrwoh na u Working President, Bah Thomas Passah.
Kumta ka KHNAM ka kwah ïa ka jingpynshai na ka MeECL ïa ka daw halor ka jingbteng ka jingpynlip bording ilektrik (load shedding).
